Read Mizo Lushai Joba 29 Bible Online

Joba 29 - Mizo Lushai bible

Joba 29

¹Joba chuan a thu sawi chhunzawmin heti hian a ti a:

²Tûn hma thla ral ta, Pathianin min vênhim laite ang khân awm ka va châk êm!

³A khâwnvâr chu ka lu chungah a êng a, A êng ringin thim chu ka kaltlang ṭhîn.

⁴Ka vânglai ni-ah te Pathianin ka puan ina min pâwl laite khân.

⁵Engkimtitheian min châmchilh a, Ka fate ka kianga an awm lai khân.

⁶Ka kawngahte hnutetui a luan dûl dûl lai leh, Lungpuia hriak kan sâwr tluk tluk laite khân.

⁷Khawpui kawngka pana ka kal chhuaha, Kawtthlêra rorêlna ṭhuthmun ka rem laite khân.

⁸Tlangvâlten min hmu a, an bibo va, Upate an tho va, an ding a.

⁹Hotute ṭawng lai pawh an châwl a, An kutin an kâ an hup a.

¹⁰Miliante pawh an ngawi ṭhuap a, An lei chu an dangah a bet a,

¹¹Ka thu sawi hriaten min fak a, Min hmututen min chawimawi a,

¹²Mi rethei ṭanpui ngai, ṭapte ka chhan chhuak a, Ṭanpuitu nei lo fahrahte pawh.

¹³Thi dâwn ṭêpin an duhsakna min hlân a, Hmeithaite pawh hlim takin ka zaitîr.

¹⁴Diknain ka inthuam a, Rorêlna dik chu ka kawrfual leh lallukhum a ni.

¹⁵Mitdel tân mit ka ni a, Kebai tân ke ka ni.

¹⁶Tlachham tân pa ka ni a, Ka hmêlhriat lohte thubuai pawh ka ngaihtuahsak ṭhîn.

¹⁷Mi sualte ngho chu ka tihtliahsak a, An thil seh chu ka pawh chhuahsak bawk.

¹⁸A rei thei ang ber dam ka tum a, “Keima in ngeiah ka thi ang,” ka ti a.

¹⁹Ka zungte chu hmun hnâwngah a zâm lût ang a, Ka zârah chuan zânkhuain dai a châm tawh ang.

²⁰Ka ropui deuh deuh vang a, Ka chak telh telh bawk ang.

²¹Miten beisei takin ka lamah beng an dawh a, Ka thurâwn nghâkin an ngawi ṭhuap a.

²²Ka han sawi zawh chuan eng mah an sawi tawh lo, Ka thu sawi chu an ei a ni.

²³Ruahtui tla tîr miin an nghâkhlel angin min nghâk a, Ruah hnuhnûng duh angin ka thu an hre duh a,

²⁴An beidawn laiin ka tihlim a, Ka hlim hmêl chuan anni chu a tiharh;

²⁵An kawng zawh tûr ka thlansak a, An hotu-ah ka ṭhu a. Sipai rual zînga lal angin ka awm a, An tân lusûnte hnêmtu ang ka ni.