Read Mizo Lushai Joba 3 Bible Online

Joba 3 - Mizo Lushai bible

Joba 3

¹Chumi hnu chuan Joba chu a lo ṭawng chhuak a, a pian ni chu ânchhia a lawh a.

²Hetiangin Joba chuan thu a sawi a ni:

³Ka pian ni chu boral rawh se, ‘Fapa a nei e,’ an tih zân nên.

⁴Chumi ni chu thimah lo chang se, Chung lam aṭangin Pathianin ngaihsak lo se, êng pawh a chungah êng suh se.

⁵Lungngaihna leh thim chhah mup chuan An pualah hauh sela, Chhûmin khuh reng sela, Chhûn tithimtu chuan tithlabâr rawh se.

⁶Chu zân chu thim chhah mupin tuam tlat se, Chumi kuma nite zîngah tel ve lo se, Thla chhiarnaah pawh tel ve suh se.

⁷Chu zân chu zân khawhar lo ni se, Tah chuan hlimna au thâwm awm suh se.

⁸Ânchhe lawh thiamte chuan Chu ni chu ânchhia lawh sela, Leviathan thunun thiamte chuan.

⁹Thim hlim arsite lo thim sela, Êng zawng mah se, hmu suh se, Zîng khawvâr pawh hmu suh se.

¹⁰Chu zân chuan ka nu chhûl kawngka a lo khâr loh avâng leh Buaina min pumpelhtîr loh avângin.

¹¹Engati nge chhûlah khân ka lo thih mai lohva, Ka pian chhuah hlima ka thaw a tâwp mai loh?

¹²Engati nge malchunga min chawia, Ka hnêk tûr hnutein min lo hmuah?

¹³Tichuan, ka mu ang a, ka reh riai ang a, Ka muhîl ang a, ka châwl hmiah tawh tûr;

¹⁴Lei lalte leh rorêltute, Mahni tâna in ram dintute nên chuan.

¹⁵Rangkachak tam tak nei lal fapate leh, An in tangkaruaa tikhattute nên chuan.

¹⁶Engati nge thi saa piang nau anga phûm bo ka lo nih loh, Nausên, êng hmu ta lo ang hian?

¹⁷Chutah chuan mi sualten an chawk buai pha tawh lo va, Chaute an châwl tawh ang.

¹⁸Mi tângte an châwl hahdam tawh ang a, Vêngtu vîn aw an hre tawh lo vang.

¹⁹Tah chuan milian leh mitê an inang tlâng a, Chhiahhlawh pawh a pu lakah a fihlîm tawh a ni.

²⁰Engati nge hrehawm tuarten hrehawm an hmuh renga, Mi lungngaite an dam reng le?

²¹Thih châk êm êm thi thei si lo, Ro phûm zawn aia nasa zâwka thih zawngtute,

²²Thi se hlim leh lâwm êm êm tûrte,

²³Kawng tinrênga Pathian dan beh tlat, Awm ngaihna hre tawh lote an dam reng le?

²⁴Chaw ka ei leh ka thaw a pik a, Ka rûm thâwm chu lui luang ri ang hi a ni.

²⁵Ka hlauhzâwng tak ka tawng a, Râpthlâk ka tih zâwng takin mi nangchîng ta.

²⁶Ka thla a muang lo va, ka awm hle hle thei lo, Ka hah a dam lo va, ka buai deuh deuh ta zâwk a ni.