Read Mizo Lushai Joba 30 Bible Online

Joba 30 - Mizo Lushai bible

Joba 30

¹Tûnah zawng ka aia naupangten min nuihzat a, An pate pawh ka ran rual vêngtu, Ui zînga telah pawh ka duh lohte an ni.

²Chûng thaṭhum tawhte bân tha chu Ka la ṭangkaipui dâwn em ni?

³Tlachham leh rilṭâmin thing zung an khel a, Thim hnuaiah thlalêr hnuchhawn ramah an vâk vêl ṭhîn.

⁴Thlalêr builukham an pawt a, Juniper zungte an chaw a ni.

⁵Mi zîng aṭangin hnawh chhuah an ni a, Rûkru angin an au zui a.

⁶Ruam kumkârahte an awm a, Khuarkhurum leh lungpui phênah te chuan.

⁷Hnimbuk hnuaiahte mangangin an râk chûl a, Kangṭhai buk hnuaiahte an tawm khâwm.

⁸Mi tlâktlailo leh bengtlalo, Mihringa chhiar tlâk loh an ni.

⁹Tûnah zawng hlaah min phuah el a, An kamchhe tleuhna ka ni ta.

¹⁰Min ten a, ka lakah an inthiarfihlîm a, Ka hmaia chil chhâk tak an nâp a.

¹¹Tûnah Pathianin ka chakna min lâksak a, Chuvângin, ka thu engah mah an ngai ta lo.

¹²Ka ding lamah mipui an lo thawk a, Ka ke-ah min kalh thlu a, Ka chhiatna tûr an belhchhah a.

¹³Ka tlân chhuahna tûr an tichhia a, Ka vânduaina an tizual a. Tu man an khap si lo.

¹⁴Kulh bang chim zau laiah an lo lût a, A chimte chuan mi delh bet a.

¹⁵Thil râpthlâk takin mi nangchîng a, Ka zahawmna thli angin a liam a. Ka hamṭhatna pawh chhûm angin a kiang zo ta.

¹⁶Tûnah ka thi dâwn ta a nih hi, Tuarna chuan min thlah si lo.

¹⁷Zankhuain ka ruhte a na ngut ngut a, Mi kher ngur ngur hi a châwl lo.

¹⁸Ka na hian nghâwnga reh angin min rêk a, Ka tâl ka tâl a, Ka silhfênte pawh ka tâl chuar zo vek a ni.

¹⁹Pathianin chirhdûpah min paih lût a, Vaivut leh vut ang chauh ka ni ta.

²⁰Nang ka ko che a, mi chhâng lo va, Ka din pawhin mi hawi si lo.

²¹Ka lakah i nun a râwng ta a, Dîm lo tawpin min khawih.

²²Nangin thli mi lentîr a, sâng takah min vawrh a, Thlipuiin mi lên mi lên.

²³Nangin min tihlum dâwn a, Mi nung zawng zawng tâna hmun ruatah chuan Min hruai dâwn tih ka hria.

²⁴Chhiat tâwk chungah engah nge kut i thawha, Eng mah ti thei lo, khawngaih dîltu chungah hian?

²⁵Buaina tâwkte tân ka ṭap ṭhîn lâwm ni? Tlachhamte ka khawngaih ṭhîn lo maw?

²⁶Thil ṭha ka beisei laiin thil ṭha lo a lo thleng a, Êng ka nghâk a, thim a lo thleng a.

²⁷Ka thin a phu hlawp hlawp a, a reh thei si lo, Hrehawm tuarna hun chuan mi rawn nang ta.

²⁸Ni em vâng ni lovin ka hmêl a thu a, Pungkhâwmho zînga dingin ṭanpui ka dîl a.

²⁹Sihalte unaupa ka ni, Ostrich-te tân ṭhian ṭha ka ni.

³⁰Ka vunte a lo dum a, a khawk a, Ka taksa pawh a lum vung vung mai.

³¹Ka ṭingṭang a ri kuai ruai a, Ka phênglâwng ri pawh ṭah hlaah a chang.