Read Mizo Lushai Joba 31 Bible Online

Joba 31 - Mizo Lushai bible

Joba 31

¹Nula ngaihmelh lo tûrin thu ka tiam a,

²Chung Pathian hnêna mihring chan tûr leh Sadaia, vân sânga awm hnêna rochan tûr eng ang nge ni?

³Mi sualte tân chhiatna leh Thil sual titute tân vânduaina a ni dâwn lo vem ni?

⁴Ka kawngte a hmu vekin Ka kepênte a chhiar lo vem ni?

⁵Dâwt sawi ka chîna, Mi bum tuma hmanhlel ṭhîn ka nih chuan,

⁶Bûkna dik takin min teh sela, Ka dikzia hi Pathian chuan a hre mai ang.

⁷Tin, kawng dik aṭanga ka pêna, Ka mitin suala min hruaia, Ka kutin thil sual a khawih chuan,

⁸Ka thawh rah chu mi dangin ei sela, Ka thlai chînte chu pawt vek rawh se.

⁹Ka ṭhenawmpa nupui ka îta. A kawngka bula ka chân rûk chuan,

¹⁰Ka nupui chuan mi dang chaw chhûm sela, Mi dangin mutpui rawh se.

¹¹Chu chu bawhchhiatna sual lian tak, Rorêltuten an hrem ngei tûr chu a ni.

¹²Chutiang sual chu, kâng ral vek thei mei a ni a, Ka sum zawng zawng pawh a kâng ral ang.

¹³Ka chhiahhlawhnu leh chhiahlawhpate chu Ka laka an vuivaina thu Dik taka ka ngaihtuahsak duh loh chuan,

¹⁴Pathian a lo thawh hunah engtin nge ka tih tâk ang? A rawn zawh fiah hunah, engtin nge ka chhân tâk ang le?

¹⁵Pum chhûnga mi siamtu khân anni pawh a siam lo vem ni? Mi pakhat kutchhuak kan ni lo vem ni?

¹⁶Tlachhamte mamawh hrênsakin Hmeithaite ka tibeidawng ngai lo.

¹⁷Ka chaw keimah maia ei lovin Fahrahte ka eitîr ve ṭhîn.

¹⁸Anni chu an tleirâwl lai ata pa angin ka enkawl a, An sên têt ata ka kaihruai zâwk ṭhîn a ni.

¹⁹Tu pawh silhfên nei lova vâkvai emaw, Hâk tûr nei lo rethei ka hmuh chuan

²⁰Ka berâm hmul ngeia siamin ka tuam lum ang a, Tichuan, anin min fak takzet ang.

²¹Rorêlnaah ṭantu ka neih dâwn avânga, Fahrahte chunga kut ka thlâk chuan,

²²Ka koki hi ka dâr saiphêng nên phawk hlawk sela, Ka bân hi a bulah tliak hmawk rawh se.

²³Pathian hrem ka hlauh êm avâng leh A ropui êm si avângin chûng thilte chu ka ti ngam lo va ni.

²⁴Rangkachak chu rinchhan bera ka hmana, Rangkachak thianghlim hnênah, “Ka himna i ni,” ka tih chuan,

²⁵Ka hausak êm avâng leh hna thawh tam avânga lâwm ka nih chuan

²⁶Ni khi a ên êm avâng leh Thla pawh a ropui êm avânga ngaisânga,

²⁷A rûka ka rilru an lo hîp beha, Anmahni zaha ka kut ka phar chuan,

²⁸Chu pawh chu rorêltu hrem ngei chi, sual a ni, Chung Pathian phatsantu ka nih dâwn avângin.

²⁹Mi hawtu chhiatnaa lâwm ka nih emaw, Thil ṭha lovin a tlâkbuak laia ka hlim viau emaw chuan.

³⁰“Thi se,” tia ânchhe lawh nân Ka kâ ka phal lo.

³¹“I chaw ei lo tu nge awm le?” Ka awmpuiten an tih loh chuan.

³²Mikhualte kawtthlêrah an riak ngai lo, Khualzinte tân ka kawng ka hawng reng ṭhîn.

³³Mi anga sualna zêp chîng ka ni lo, Sualna ka pai ru ve ngai lo.

³⁴Mipui zah avâng leh chipuite hau hlauh vânga Ngawi renga awma lêng chhuak ngam lovin ka awm ngai lo.

³⁵Ka thu ngaithlatu tûr an awm na nge aw, Ka sawi apiang a dik asin. Engkimtitheian mi chhâng teh se, Ka chhiar atân min hêkna hi ziak chhuah ni se ka va ti êm!

³⁶Chhuang takin ka kokiah ka târ ang a, Lallukhum angin ka khum ang.

³⁷Ka tih apiang Pathian ka hrilh ang a, Ngampa takin amah ka pan ang.

³⁸Ka lo neih lai hi ka rûk a niha, A neitu dik tak chhuhsak ka nih chuan.

³⁹Man pe lova a rah chauh ei ka lo niha, A thlotute dangchâra ka siam chuan,

⁴⁰Huit aiah hlîng ṭo zâwk sela, Barli aiah hlohar ṭo zâwk rawh se. Joba thu chu a tâwp ta.