Read Mizo Lushai Joba 33 Bible Online

Joba 33 - Mizo Lushai bible

Joba 33

¹Tûnah, Joba, ka thu hi ngaithla la, Ka sawi zawng zawng hi ngun takin ngaithla rawh.

²Ngai teh, ka kâ ka âng a, Ka han sawi ve dâwn e.

³Rilru ngîl tak pua sawi ka ni, Ka thil hriat chu dik takin ka sawi dâwn.

⁴Pathian Thlarau chuan mi siam a, Engkimtitheia thaw chuan nunna min pe.

⁵I theih chuan mi han chhâng la, Ṭanfung siam la, mi hmachhawn teh.

⁶Pathian mit hmuhin nangmah ang bawk ka ni, Kei pawh hluma siam ve mai ka ni.

⁷Ngai teh, nanghi mi hlau tûr i ni lo ve, Ka nawr lutuk lo vang che.

⁸I sawi kha ka hria a, I thute pawh ka hre reng asin.

⁹“Sualna rêng nei lovin ka thianghlim a, Sawisêlbo ka ni a, khawlohna lakah ka fihlîm a ni.

¹⁰Ngai teh, ka lakah chhuanlam a zawng a, A hmêlmaah mi chhiar ta a,

¹¹Ke kawl min buntîr a, Ka awm dân tinrêng mi enthla reng,” i ti a.

¹²Ngai teh, ka hrilh a che, he thilah hian i tidik lo, Pathian chu mihring aiin a ropui zâwk a ni.

¹³Kam khat maha a chhân loh che avângin Engah nge ani chu i hau le.

¹⁴Pathianin kawng hrang hrangin thu a sawi a, Mahse, mihringin an hrethiam lo.

¹⁵Tui taka mi an muthilha, Khumlaizâwla an mut laiin Mumangah te, inlârnaah te an hnênah thu a sawi ṭhîn.

¹⁶An beng chu a tihawng a, A zilhhauna avângin an thlaphâng a.

¹⁷Mihring chu a thiltih a ṭhulhtîr a, Chapona lakah a vêng him a.

¹⁸Ani chu thlâna liam lo tûr leh, A nunna pawh khandaiha thi lo tûrin a vêng.

¹⁹Ani chu natna khumah thunun a ni a, A ruh na pawh a reh thei lo.

²⁰Chaw châkna rêng a nei lo va, Sa tuihnai takte pawh a châk hek lo.

²¹A chêr êm êm a, Ruh hlîr ruh hlîr a ni.

²²Ani chuan mitthi khua a hnaih ta hle a, A nunna chu an lâksak ṭêp a ni.

²³A lamṭang tûr Vântirhkoh sâng zînga pakhat tal, Mihring tih tûr dik tak hrilhtu awm teh sela!

²⁴Amah duhsak takin, “Mitthi khuaah kaltîr teh suh, A tlanna man ka hmu ta e,” ti se.

²⁵A tisa chu lo tuai thar leh sela, A vânglai nite chu lo inher kîr leh rawh se.

²⁶Pathian hnênah a ṭawngṭai ang a, a lo duhsak ang a, Pathian hmêl chu hlim takin a hmu ang a, Chhan chhuah a nih thu chu mite hnênah a puang darh ang.

²⁷“Thil dik ti lovin thil sual ka lo ti ta a, Mahse, ka phu angin ka tuar si lo,” Tiin vântlâng zîngah hla a sa ang.

²⁸Tichuan, mitthi khuaa liam mai tûr a chhanhim a, A nunin khaw êng a hmu leh ta.

²⁹Pathianin hêng thil zawng zawng hi Mihring tân vawi hnih vawi thum a ti ṭhîn.

³⁰Thlân kotlâng aṭangin a nunnate a hruai kîr a, Nun hlimnate a neihtîr ṭhîn.

³¹E, Joba, ngun takin mi ngaithla teh, Ngawi la, ka han sawi zêl ang e.

³²Sawi tûr i nei ve a nih leh mi chhâng la, Eng mah zêp suh, i dikzia hriat ka châk a ni.

³³Sawi tûr i nei lo a nih leh mi ngaithla la, Lo ngawi la, finna ka zirtîr ang che.