Read Mizo Lushai Joba 34 Bible Online

Joba 34 - Mizo Lushai bible

Joba 34

¹Tichuan, Elihua chuan a sawi zêl a,

²Nangni mi fingte u, ka thu ngaithla ula, Nangni mi thiamte u, in beng lo dawh rawh u.

³Kâin tui a hria a, Bengin thu ṭha leh ṭha lo a hria

⁴A dik chu thlang ila, Kan tâna ṭha ṭha chu i thlang. tlâng ang u.

⁵Joba chuan, “Mi ṭha ka ni a, Mahse, Pathianin ka dikna mi hnâwlsak a.

⁶Ka dik reng chu dawtheiah min puh a, Bawhchhe lo pui tihdam rual lohvin min hliam hi,” a ti a.

⁷Joba anga mi hmusit chîng Tu nge awm ang le?

⁸Thil sual titute nên inkâwma, Mi sualte nêna lêng ho ṭhîn chu tu nge?

⁹“Pathian tihlâwm tum hi mihring tân Hlâwkna eng mah a awm lo,” a ti vei a.

¹⁰Chuvângin, nangni mi fingte u, Pathian chuan thil sual tiin Engkimtitheia chuan thil dik lo a ti teuh lo vang.

¹¹An thiltih ang zêlin mite a thungrûl a, An phu tâwk ang zêlin mi tin a rêlsak dâwn si a.

¹²Pathianin thil sual a ti hauh lo vang, Engkimtitheia chuan dik lo takin a rêl hek lo vang.

¹³Tu nge leilungah hian thu neihtîra, Khawvêl pum pui hi kawltîrtu chu?

¹⁴A thlarau chu a lâk kîra, A thaw chu a lâksak chuan,

¹⁵Mi zawng zawng hi an boral ang a, Mihring chu vaivutah a kîr leh ang.

¹⁶Hriatthiamna i neih chuan hei hi ngaithla la, Ka sawi hi ngaihtuah ngun ang che.

¹⁷Thu dik hawtu chuan ro a rêl ang maw? Mi dik leh thiltitheia chu i thiam lo dâwn em ni?

¹⁸Ani chuan lal chu, “Tlâktlailopa” a ti a, Mi ropui pawh, “Mi sualpa,” a ti ngam bawk asin.

¹⁹Hotute pawh a duhsak bîk lo va, Mi hausa pawh rethei aiin a ngaihsak chuang lo va, A kutchhuak vek an ni.

²⁰Zânlaiah an thi thut a, Pathianin a sawisa a, An boral a, Mi chakte pawh mihring kut hmang lova lâk bo an ni.

²¹Mihringte awm dân a hmu vek a, An thiltihte a en reng ṭhîn.

²²Thilsualtitute bihrûkna tûr Thim chhah tâwk a awm lo.

²³Mihring chunga a rorêl hun tûr Pathianin tu mah a ruatsak lo.

²⁴Mi ropuite a titlâwm a, an aiah mi dang a dah a, A tân an chanchin chhui lâwk a ṭûl lo.

²⁵An thiltihte chu a hriat reng avângin Zânah anni chu a paihthla a, a nuai bo.

²⁶An sual avângin Mite mit hmuhah anni chu a hrem a,

²⁷An pên bosan avâng leh A dânte an pawisak loh avângin.

²⁸Pathian hriat khawpin retheite an rûmtîr a, Hnehchhiahte au thâwm chu a lo hre ta.

²⁹A ngawih reng pawhin tu nge dem thei ang? A hmêl a thup laiin tu nge hmu thei?

³⁰Mi mal chungah pawh, hnam chungah pawh, Thuhmun rengin a che. Pathian hre lo mi chuan ro a rêl lohna tûr leh, Mipui an bum lohna tûrin.

³¹Miin Pathian hnênah hetiangin sawi sela, “Thununna ka tuar a, ka sual zui tawh lo vang,

³²Ka hmuh theih loh chu mi zirtîr la, Ka lo tihsual chu ka ti leh tawh ngai lo vang,” ti sela,

³³Pathian thiltih i do si a, I duh angin tihtîr i tum em ni? Ka hrilh ang che ni lovin, Nangmah ngeiin thu titlu rawh. I rin dân tak chu han sawi teh.

³⁴Hriatna neite leh mi fingte chuan Ka thu sawi hi an hriatin mi pawmpui ang a,

³⁵“Joba hi eng mah hre lovin a ṭawng mai mai a, A thu-ah hian finna a awm lo,” min tihpui ang.

³⁶Joba thu sawi hi ngaihtuah ngun teh u, Mi sual angin thu a sawi mai mai a ni tih in hre thei ang.

³⁷A sual belhchhahin a hel a, Kan hmuhah hmusit takin Pathian kut a ben khum a, A âng chiam a nih hi.