Read Mizo Lushai Joba 36 Bible Online

Joba 36 - Mizo Lushai bible

Joba 36

¹Elihua chuan a sawi zêl a:

²Rei lo tê tal min ngaithla la, ka han hrilh ang che. Pathian hmingin sawi tûr ka la nei cheu a ni.

³Ka hriatna ka han fawmkhâwm vek teh ang, Mi siamtu dikzia chu ka târlang dâwn e.

⁴Ka thu sawi hi dâwt a ni lo tih hre rawh, Hriatna kawnga mi puitling i kiangah a awm reng hi.

⁵Pathian chu a chak a, tu mah a hmusit lo, Engkim a hre vek a ni.

⁶Mi suaksualte a zuah lo va, Hnehchhiahte dik takin ro a rêlsak ṭhîn.

⁷Lalṭhutthlêngah lal angin a ṭhuttîr a.

⁸Mahse, miten kawl an bun a, Hnehchhiahna hruia phuar an lo nih chuan

⁹An thil tih leh an bawhchhiatna a hriattîr a, An lo chapo ṭhinzia te nên.

¹⁰A zilhna ngaithla tûrin a hrilh a, An sual sim tûrin thu a pe.

¹¹Thu awih taka a rawng an bâwl chuan, An damchhûng chu hmuingîl takin an awm ang a, Nuamsa takin an awm bawk ang.

¹²An ngaihthlâk loh erawh chuan khandaiha thah an ni ang. Tu ma hriat hlawh lovin an thi ang.

¹³Pathian zah lote chu an thinur ṭeuh reng a, A hrem lai pawhin ṭanpui dîlin an au duh lo.

¹⁴An vânglai takin an thi ang a, Mualpho takin an boral ang.

¹⁵Tuarna hmangin Pathianin mi a zirtîr a, Harsatnain an beng a tihvârsak ṭhîn.

¹⁶Ani chuan manganna hmun ata a hruai chhuak che a, Hmun thâwl takah thawveng takin a awmtîr che, Thil tui tinrêng a hlui ta che a ni.

¹⁷Mahse, nang chuan i sual man i tuar ta a, Dik taka rorêlsak i nih tâk hi.

¹⁸Hausak châknain hruai bo che suh se, Thamna tam tak avângin bumin awm suh.

¹⁹I hausakna leh i chakna zawng zawng chu I mangan loh phah dâwn em ni?

²⁰Zân chu nghâkhlel suh, mite an awmna hmuna an boral hun a ni.

²¹Sual lam âwn lo tûrin fîmkhur rawh, Thil sual i tih loh nân a ni hrehawm i tuar hi.

²²Ngai teh, Pathian chu thiltithei chungchuang a ni, Zirtîrtu ropui ber a ni.

²³Tu nge a thil tih dân tûr ruahmansaka, “I ti dik lo a ni,” ti thei le?

²⁴A thiltih ropui tak hi hre reng la, Miten fakna hlain an chawimawi ṭhîn a ni.

²⁵Mi tinin chu chu an en a, Hla tak aṭang chauhvin an thlîr ta ṭhîn.

²⁶Pathian ropuizia hi kan hre sêng lo a ni, Engtia upa nge a nih chhui chhuah rual a ni lo.

²⁷Tui mal far tê tê chu a hîp chho va, Tui hu chu ruahtui thiangah a chantîr a.

²⁸Vân aṭangin a sûrtîr a, Mihring tân a sûrtîr buan buan ṭhîn.

²⁹Chhûm insemdarh dânte hi mihringin a hre thei em? A awmna hmun ata khawpui a rîktîr dur dur dânte hi?

³⁰Ngai teh, chung lamah khian kâwl a phettîr zawr zawr a, Tuifinriat mawngte chu a thim tlat si.

³¹Hêng hi hnamte rem a ruatsak dân a ni. Tichuan, ei tûr tam tak a pe a ni.

³²Ṭêk chu a hûm reng a, A tum tak fuh tûrin a tlâktîr ṭhîn.

³³Khawpui ri hum hum chuan thlipui lo thleng tûr a entîr a, Ran rualte pawhin a lo hnaih tawhzia an hria.