Read Mizo Lushai Joba 37 Bible Online

Joba 37 - Mizo Lushai bible

Joba 37

¹Hei vâng hian ka khûr a, Ka thin a phu hlawp hlawp a ni.

²Ngun takin ngaithla teh, a awrâwl ri hum hum te, A ka aṭanga thâwm nasa tak lo chhuakte chu,

³Vân hnuai hmun tinah kâwl a phêttîr a, Leilung hmun tin a fang chhuak a.

⁴A hnuah chuan a awrâwl a chhuah a, A aw ropui tak chu a ri hum hum a. Kâwl a phe zawr zawr reng bawk a.

⁵Pathian chuan mak takin khawpui a tiri a, Thil ropui tak, kan hriatthiam phâk loh a ti a ni.

⁶Vûr hnênah, “Leiah tla rawh,” a ti a, Chutiangin ruahpuivânâwn hnênah, “Sûr buan buan rawh,” a ti a.

⁷Mi tinrêng kut a chelhsak a, Ama tih a ni tih mi zawng zawngin an hriat nân.

⁸Tichuan, ramsaten bihrûkna an zawng a, An chênna pûkah te an tawm reng mai.

⁹Chhim lam aṭangin thlipui a lo thawk a, Hmâr lam aṭangin thli vâwt a lo tleh a.

¹⁰Pathian thaw chuan vûr tlang a siam a, Tuipui zau tak tak pawh a tikhang ṭhîn.

¹¹Chhûm chhahpui chu tui a paitîr a, Chhûm zîngah chuan kâwl a phêttîr a,

¹²A thupêk angin an de zawr zawr a, Khawvêl pum puiah a thu angin thil an ti zêl a ni.

¹³Mihring hrem nân emaw, leilung tihṭhat nân emaw A duhsakna lantîr nân emaw chûng chu a hmang fo ṭhîn.

¹⁴Joba, hei hi lo ngaithla teh, Beng sikin Pathian thil tih makte chu ngaihtuah teh,

¹⁵Pathianin chhûm a thunun dân leh kâwl a phêttîr dân hi i hria em ni?

¹⁶Khua a dur dân te, Hriatna famkim neitu thil tih makte hi i hre pha em?

¹⁷Chhim thli lum a lo tleh a, I kawrte chu i thlanin a huh zo ṭhîn.

¹⁸Ani angin vân i kaipharh thei em ni? Ngên tlang anga khauh chu?

¹⁹A hmaa kan sawi tûr chu min hrilh rawh le, Thimin min tuam a, sawi tûr ahleih kan hriat loh hi.

²⁰Kei chuan a hnêna thu sawi ka ngam lo vang, Min tihchhiat theihna kawng ka siam dâwn lo.

²¹Tûnah vâna êng khi a tle sur a, A ên êm avângin kan en ngam lo. Thliin vân chu a chhêm veng ta si a.

²²Hmâr lamah mawi takin a lo êng a, Pathian chu ropui râpthlâk takin a lo kal.

²³Engkimtitheia, hriat phâk lohva chu a ropui êm êm a, Dik takin ro a rêl a, hleih a nei lo. Tu mah a hnehchhiah lo.

²⁴Chuvângin, miten amah an ṭih a, Intifingte erawh chu tu mah a pawisa lo.