Read Mizo Lushai Joba 38 Bible Online

Joba 38 - Mizo Lushai bible

Joba 38

¹Tin, LALPA chuan thlipui aṭangin Joba chu heti hian a chhâng a:

²Eng mah hre si lovin engtizia nge ka remruat i sawi nawi?

³Mipa takin i puan ven sawi chhîng la, Thu ka zâwt ang che a, mi chhâng ang che.

⁴Leilung nghahchhan ka phûm lai khân khawiah nge i awm? I hriat takmeuh chuan han sawi teh.

⁵A len dân tûrte tu nge ruahman i hre meuh maw? A nih leh, a zauzâwng tu nge ruat?

⁶Eng chungah nge a innghaha, Tu nge a kil lung phûmtu chu?

⁷Zîng lam arsite an kal dual dual a, Pathian fate hlim taka an au kha.

⁸Tuipui chu a awmna ata A lo len dûl dûl lai chuan tu nge lo dang chat?

⁹A silhfên atân chhûm ka siam a, Thim chhah takin ka tuam a.

¹⁰A chîm chin tûrte ka ruat a, A danna leh khârna tûrte nên.

¹¹“Heti thleng chauh hi lo kal la, pêl hauh suh, Hetah hian i fâwn vêl tâwp rawh se,” ka ti a.

¹²I pian chinah khua vâr tûrin thu i pe ngai em? A vâr ṭanna hmun tûr i hrilh ngai em?

¹³Lei chungah khua vârtîrin An bihrûkna ata mi sualte chu i lailang ngai em?

¹⁴Khaw êngah chuan leia tlâng leh ruamte a lang fiah a, Puan angin a ze chân buai mai.

¹⁵Mi sualte tân khaw lo êng chu a êng lutuk a, Pawi rêng an khawih ngam lo.

¹⁶Tuipui lo irh chhuahna hnâr i tlawh tawh em? Li mawng thûk laite i dai tawh em?

¹⁷Mitthi khaw luhna leh thim mup luhna kawngka chu I hmu tawh ngai em ni?

¹⁸Lei zauziate hi i hre phâk em? I hriat chuan han sawi teh,

¹⁹Êng awmna in kawng chu khawiah nge? Khawiah nge thim chu a awm ṭhin?

²⁰An kalna tûr thlenga hruaiin An in lamah i hruai hâwng leh thei em?

²¹I hria ang chu! Chûngah chuan i piang tawh a, I upat tawh êm hi!

²²Vûr dahkhâwmna i tlawh tawh em? Rial kal khâwmna in pawh i hmu tawh em ni?

²³Buai hun atânte leh indo leh inbeih nia hman atân Chûng chu ka khêk a ni lâwm ni?

²⁴Êng hi engtizia nge a ṭaidarha, Khawchhak thli pawh lei chunga a insem darh le?

²⁵Tu nge tuihâwk luanna kawrte sial a, ṭêk kalkawng siam le?

²⁶Mihring chên lohna ram leh thlalêr, Mi awm lohna hmunah tu nge ruah sûrtîra,

²⁷Ram ro leh pilril tihnâwnga, Hnimhringte tu nge ṭotîr?

²⁸Ruahin pa a nei em ni? Daifîm hi tu hrin nge?

²⁹Tu chhûl aṭangin nge vûr a lo chhuah? Vân aṭanga vûr lo tla ṭhîn hi tu hrin nge?

³⁰Tui khalte chu lung ang maiin a sak a, Tuithûkpui chungte pawh a khal a.

³¹Siruk hi i phuar khâwm theiin Chhohreivûng khi i phelh darh thei em ni?

³²Arsite khi a hun takah i chhuahtîr theiin Zângkhua leh a bâwmtute khi i hruai thei em?

³³Chung lam vân awm dânte khi i hria em? Leiah hian an dânte chu i chhawr thei em?

³⁴Nan tûr chein, ruahpuivânâwn, Chhûm aṭangin i ko thla thei em?

³⁵Kâwlphete chu i hnêna lo kal tûra thu pein “Heta hi ka awm,” an rawn ti dâwn em ni?

³⁶Tuivalawngin engtin nge lui lian tûr a hriat? Arpa pawhin khaw chêng tûr engtin nge a hriat?

³⁷Tu nge chhûmte fawm khâwm thiama, Vân tuizêmte leihbaw thei?

³⁸Vaivutte a inhlâwm khâwma, Lei tlangte a inbelhbawm hi?

³⁹Sakeibakneipui chaw i zawnsakin A no hruaite kham khawp chaw i pe thei em ni?

⁴⁰An pûkahte an bawk a, Seh tûr châng laite chu?

⁴¹Choak chaw zawng vâk vêl te, An noten chaw dîla Pathian hnêna an hrâmte hian Tu nge ei tûr pe?