Read Mizo Lushai Joba 39 Bible Online

Joba 39 - Mizo Lushai bible

Joba 39

¹Sathâr no neih hun i hria em? Sazuk no nei lai i hmu em ni?

²An pai chhûng thla zât chhiarin an hrin hunte i hria em?

³An bawk a, nau an vei a, An hring mai ṭhîn.

⁴An note chu an pian a tlang a, Ramhnuaia ṭhang lianin an tla hrang a, An puite hnênah an kîr leh tawh lo.

⁵Ram sabengtung chu tu nge sezâwl chhuah? A duh duhin tu nge tlattîr?

⁶An awm nân thlalêr ka ruatsak a, Chên nân chi tamna ram.

⁷Khawpui hulûm engah mah a ngai lo va, Tu man an khawi ngamin an chhawr ngai lo.

⁸A tlatna chu tlângpui dung a ni a, Hnimhring peh tûr a zawng zêl ṭhîn.

⁹Sele-pa chu i chhawr thei dâwn em ni? I ran inah a riak duh meuh ang maw?

¹⁰Lei let tûrin hrui i bahtîr thei ang em? I hnungah a ruam lai a rawn hrût rual ang maw?

¹¹A chak êm avângin a tha chu rinpuiah i hmangin I hna hahthlâk a kovah i nghat thei dâwn em ni?

¹²I buh i sengtîr thei dâwn em ni? I hruiha buh a khungsak ang che maw?

¹³Ostrich chuan nasa takin a thla a zâp thei a, Mahse, kânghlai angin a thlâwk thei lo.

¹⁴Leiah a tui a phûm a, Vaivut chuan a khuh lum a.

¹⁵Miin an rap keh thei a, Ramsaten an chîl keh thei tih a dâwn pha lo.

¹⁶A no ni lo ang hrimin a ngaihsak lo va, A hahpuina chu thlâwn mah se pawi a ti lo.

¹⁷Pathianin finna a pe lo va, Hriatthiamna a pêk hek loh avângin.

¹⁸Tlân tûra a han intihpuk meuh chuan, Sakawr leh a chungchuangte pawh a thamlo.

¹⁹Sakawr hi i tihchak em ni? A tuang hi i siamsak a ni a maw?

²⁰Khau anga kat tûrin i siam em ni? A hnâr tum dur durte hi a hlauhawm a nia.

²¹Ruamah a ke phiatin a inhrosa a, Indona hmunah a tlân lût ṭhîn.

²²Hlauh rêng a nei lo va, a zâm ngai lo, Khandaih lakah a tîm ngai bawk hek lo.

²³A chungah thal bâwm a ri rawk rawk a, Fei leh thal a tle zawr zawr mai.

²⁴Thatho takin a lîm puat puat a, Tawtawrâwt thâwmah a zauthau va, A awm hle hle thei lo.

²⁵Tawtawrâwt a rîk phawt chuan a hnâr a tum a, Indo thâwm chu hla tak aṭangin a hre thei, Hotute au leh an haw haw chu.

²⁶Vân sânga mu thlâwkte khi i zirtîr em ni? Chhim lam hawia an thla an zârte hi?

²⁷I thupêkin em ni muvânlai a invânvawrha, Sâng taka bu a chheh?

²⁸Khâmahte a chêng a, Lungpui kehkâr hmun himahte a riak ṭhîn.

²⁹Chuta ṭang chuan ei tûr a mitmei a, hla tak tak a hmu phâk a ni.

³⁰A notê pawhin thisen an dâwt a, Saruang awmnaah an awm khâwm ṭhîn.