Read Mizo Lushai Joba 4 Bible Online

Joba 4 - Mizo Lushai bible

Joba 4

¹Elifaza, Teman mi chuan heti hian a han sawi a;

²“I hnênah thu kam khat sawi ila i hua ang em? Ngawih mai theih a ni bîk si lo va le!

³Ngaihtuah teh, mi tam tak i lo zirtîr a, Kut chak lote i lo tichak tawh a.

⁴I thu chuan tlute a tungding a, Khûp zâwite a tichak ṭhîn.

⁵Harsatna i chungah a lo thleng ve ta a, I chau ta dêr a, A han tlâkbuak che a, I buai chhe ta a.

⁶Sakhaw mi i nihna hian a thlamuan lo che em ni? I nun ngîl avângin i ngaih a ṭha chuang na nge?

⁷Ngaihtuah vang vang teh, Pawi khawih si lo tu nge chhiatna tâwka, Khawiah nge mi ṭha ngaihthah an nih i hriat?

⁸Ka lo hmuh ve dân chuan, Tu pawh, khawlohna, lei anga leta, Buaina chi theh chuan a ngai vêk an seng leh ṭhîn.

⁹Pathianin a thâwk khum a, an boral ṭhîn a, A thinurna thli chuan a chhêm bo ṭhîn.

¹⁰Sakeibaknei rûm te, sakeibaknei kawlh hâhum te a titâwp a, Sakeibakneituai hâte a tibal a.

¹¹Sakeibaknei tar chu ei tûr tlachhamin a boral a, A pui no hruaite chu an tidarh ta.

¹²A rûk têin ka hnênah thu a lo thleng a, Ka beng bulah a rawn phun ser ser a,

¹³Chu chu mut ngheh hun lai takin Ka lo mangphan a.

¹⁴Hlauvin ka khûr ta zawih zawih a, Ka tirilah min man a.

¹⁵Thlâ-in ka hmai a rawn thawi a, Ka hmulthi a ding sung sung a,

¹⁶A han ding a; mahse, a hmêl ka hmu fiah thei lo, A riruang chu ka hmu a, A ngawi reng a, aw ka hre ta a.

¹⁷Mihring hi Pathian hmuhin a fel tâwk em ni? A siamtu hmaah a thianghlim tâwk a maw?

¹⁸A chhiahhlawhte pawh a ring zo lo va, A tirhkohte fel lohna pawh hmu ṭhîntu chuan

¹⁹Leia chêngte chu a va ring lo lehzual dâwn êm! Vaivuta siam mai an ni si a, Phêngphehlep anga râwp ral mai tûr an ni,

²⁰Ni khat thil thuah an boral mai a, Tu khaw ngaihsak lohvin an ral hlen ṭhîn.

²¹An neih zawng pawh a ral a, Fing chuang lovin an thi a ni lâwm ni?