Read Mizo Lushai Joba 40 Bible Online

Joba 40 - Mizo Lushai bible

Joba 40

¹ LALPA chuan Joba hnênah,

²“Sawisêltu, Engkimtitheia chu i hnial ang maw? Pathian hnialtu, i chhâng zêl dâwn em ni?” a ti a.

³Tichuan, Joba chuan LALPA chu a chhâng a:

⁴“Kei mi tlâktlailo tak hian Engtin nge ka chhân theih ang che? Ka kâ ka hup mai a ni.

⁵Vawi khat ka sawi tawh a, ka chhâng tawh lo vang che, A ni, ka sawi nawn dâwn tawh lo.”

⁶ LALPA chuan thlipui aṭangin Joba chu a chhâng a:

⁷Mipa takin i puanven sawi chhîng la, Thu ka zâwt ang che a, mi chhâng ang che.

⁸Ti dik lovah min puh dâwn em ni? Thiam i chan theih nân Thiam loh min chantîr dâwn em ni?

⁹Pathian angin i chak em ni? A aw anga ring aw i nei em ni?

¹⁰Chuti a nih chuan intiropuiin intizahawm la, Mawi tak leh ropui takin inthuam rawh.

¹¹Mi chapote chu en la, An chungah i thinur nasa tak chu leih rawh.

¹²Mi chapote chu en bîkin titlâwm la, Mi sualte chu an awmhmunah rap hrep ang che.

¹³An vaiin leiah phûm khâwm la, Thlânah an hmaite tuam ang che.

¹⁴Tichuan, i kut ding lamin mahni i inchhan thei tih Kei pawh hian ka hria ang.

¹⁵En teh, Behemot hi, nangmah ang bawka Ka kutchhuak a nih hi. Bâwng angin hnimhnah a ei ṭhîn.

¹⁶A chakna chu a kâwngah a awm a, A thahrui chu a dul thuarah.

¹⁷A mei chu sidar thing angin a tikhauh va, A malpui thate pawh a phiar tlat mai.

¹⁸A ruhte chu ngên kawrawng anga khauh a ni a, A kête pawh thîr tlâwn ang mai a ni.

¹⁹Pathian thil siam zîngah a pui ber a, A siamtu chauhvin khandaihin a vau bet thei.

²⁰Tlângah te a peh tûr hnim a ṭo va, Tah chuan, ram sakawlhte an tualchai ṭhîn.

²¹Lotus hlîngnei buk hnuaiah a bawk a, Phairuang dûm zîngahte a biru ṭhîn.

²²Lotus buk chuan a hliah a, Lui kam tuipuisuthlah chuan a zâr hlim.

²³Tui lian so bulh bulh chu a hlau lo va, A ka chîm khawpin Jordan lian mah se a pawisa lo.

²⁴A mit tuamin tu nge man thei ang? A hnârah tu nge thil tlang thei ang?