Read Mizo Lushai Joba 41 Bible Online

Joba 41 - Mizo Lushai bible

Joba 41

¹Nghakuaiin Leviathan i âwk thei em ni? Hruihrualin a lei i phuar thei em?

²A hnârah hrui i thil tlang thei em? Thîr kawmin a khabe-ah i thil thei em?

³Khawngaih a dîl dâwn che em ni? Hawihhâwm takin a bia ang che maw?

⁴Dam chhûnga i chhiahhlawha awm tûrin Thu a thlunpui ang che maw?

⁵Sava angin i khawi ngam thei ang em? I fanute chaih atân i hlîng thei ang em?

⁶Sangha mantuten indâwr nân an hmang em ni? Sumdâwngtuten lei atân an chan darh dâwn em ni?

⁷A vunah feikibâr te, a lu-ah nghafei te I riah thei em ni?

⁸A chungah kut han thlâk teh rêng, A hlauhawmzia i hria ang a, I ti leh tawh ngai lo vang.

⁹Ani tihtlâwm tum chu beidawnthlâk tak a ni, A hmêl mai pawh a râpthlâk êm a ni.

¹⁰Amah cho tho tûrin tu mah huai tâwk an awm lo, Chuti a nih si chuan tu nge min do ngam ang?

¹¹Tu nge ka rulh leh tûra thil min pe hmasa? Vân hnuaia thil engkim hi ka ta asin.

¹²Leviathan fuke chu ka han sawi zêl teh ang, A chakzia leh a pian thiamzia te nên.

¹³Tu nge a vun pâwnlâng pawt hîk thei ang? Tu nge a vunpui tipawp thei ang?

¹⁴Tu nge a kâ keu ânga, A ha kual kulh hlauhawm tak chu keu lang ngam ang?

¹⁵A phuhlip inthuah tup chu a chhuan ber a ni, A insi phui tlat a, lung ang maia sak a ni.

¹⁶A insîk phui tlat avângin A kârah boruak pawh a lût thei lo.

¹⁷A inzawm a, a inchâr tlat a, Kaih ṭhen theih a ni lo.

¹⁸A hahchhiau chuan êng a phuh chhuak a, A mitte chu khawfîngchat ang rû a ni.

¹⁹A kâ aṭangin mei alh a chhuak a, Meisîte a ṭêk ur ur a.

²⁰A hnâr aṭang chuan meikhu a lo chhuak a, Sa so bêl nghawr leh phairuang mût ang vut vut a ni.

²¹Meihawl a chhêm vâm a, A kâ aṭangin meialh a lo chhuak a.

²²A nghâwng tha chu a chak êm a, A tawk apiang hlauvin an khûr.

²³A vunah nêm lai rêng a awm lo va, Thîr anga sak a ni, vih pawh rual a ni lo.

²⁴A thinlung chu thîr anga sak a ni, Râwtsawmna lung hnuai zâwk anga chang hi.

²⁵A lo thawh meuh chuan mi chakte pawh an khûr a, An hlau va, an thla a bâr zo va.

²⁶Khandaihin sât mah se, pem pawh a pem lo vang, fei te, thal te, feiṭam te chuan a chhun thei lo.

²⁷Thîrte chu buhpâwl ang lekah a ngai a, Ngênte pawh thing mawih angah.

²⁸Thal hlauvin a tlânchhe ngai lo va, Sairawkherha perh pawh favaia theh ang a ni.

²⁹Talhtum chu buhpâwl ang lekin a ngai a, Thal ri rawk rawk pawh a thamlo.

³⁰A dul phuhlip chu lampei anga hriam a ni a, Mawiin lei a hrût angin chirhdiak zîngah a tâl vêl a.

³¹Tui thûk tak chu bêl angin a tiso buah buah a, Tuipui chu bêlte angin a tiphûl.

³²A kalna chu a vâr ruah a, Tuipui phuan vâr emaw an ti.

³³Leiah hian amah ang rêng an awm lo va, Eng mah hlauh nei lova siam a ni.

³⁴Ramsa ngêng tak takte chu a thamlo va, Inluling tak takte chungah a lêng a ni.