Read Mizo Lushai Joba 42 Bible Online

Joba 42 - Mizo Lushai bible

Joba 42

¹Tichuan, Joba chuan LALPA chu a chhâng a:

²“Engkim i tithei tih ka hria, I tum chu dâl rual a ni lo.

³Eng mah hre si lo hian engtizia nge I remruat hi ka lo sawisêl mai le! Ka hriatthiam lohte chu ka lo sawi a ni, Ka hriat phâk loh, ka tâna mak lutukte chu.

⁴I sawi ngaithla tûr leh I zawhna chhâng tûrin min ti a,

⁵Mi sawi aṭang chauhvin ka lo hria che a, Mahse, tûnah zawng ka mit ngeiin ka hmu ta che a ni.

⁶Chuvâng tak chuan ka inten a, Vut leh vaivuta ṭhuin ka sim ta e,” a ti a.

⁷Tin, LALPA chuan Joba hnêna hêng thu hi a sawi zawhin, Elifaza, Teman mi hnênah, “I chungah leh i ṭhian pahnihte chungah ka thin a ur hle a ni. Ka chhiahhlawh Joba angin ka chungchâng thu dik takin in sawi si lo.

⁸Tichuan, bâwngpa pasarih leh berâmpa pasarih keng ula, ka chhiahhlawh Joba hnênah va kal ula, in tân hâlral thilhlan va hlân rawh u. Tin, ka chhiahhlawh Joba chuan a ṭawngṭaisak ang che u a, a dîl angin ka lo pawmsak ang a, in âtzia ang zêl chuan ka thungrûl lo vang che u, ka chhiahhlawh Joba angin ka chungchâng thu dik takin in sawi si lo va,” a ti a.

⁹Tichuan, Elifaza, Teman mi te, Bildada, Sua mi te, Zofara, Naama mi te chu an va kal a, LALPA thupêk ang zêl chuan an ti a. Tin, LALPA chuan Joba dîlna chu a ngaithla a.

¹⁰Joban a ṭhiante a ṭawngṭaisak hnuin LALPA chuan Joba chu a tiṭha a, a hmaa a neih lêt hnih a pe leh ta a.

¹¹Tin, a unaute leh a farnu zawng zawngte, tûn hmaa a hmêlhriat zawng zawngte chu a hnênah an lo kal a; a inah chawhlui an kîl ho va. LALPA chuan a chunga thil ṭha lo a thlentîr avângte chuan pawi an tihzia an hrilh a, an thlamuan a. Mite chuan tangkaraw tlang te, rangkachak zungbunte an pe ṭheuh va.

¹² LALPA chuan Joba hun hnuhnûng chu a hun hmasa aiin nasa takin mal a sâwm a. Berâm sîngkhat leh sângli, sanghâwngsei sângruk, bâwng tuak sângkhat, sabengtungpui sângkhat a nei a.

¹³Fapa pasarih leh fanu pathum a nei bawk a.

¹⁴A fanu upa ber hmingah Jemimai a sa a, a dawttu hmingah Keziaii, a pathumna hmingah Keren-hapuki a sa ta bawk a.

¹⁵Ram zawng zawngah pawh Joba fanute anga nula hmêlṭha an awm lo. An pa chuan anni chu an nuṭate nên ro chan tûr a siamsak ṭheuh va.

¹⁶Hemi hnu hian Joba chu a dam zêl a, kum za leh sawmli a dam a ni. A fapa te, a tupa te, chhuan li thlengin a hmu phâk a,

¹⁷Joba chu upa tak, tarkûna damin a thi ta a.