Read Mizo Lushai Joba 5 Bible Online

Joba 5 - Mizo Lushai bible

Joba 5

¹Han ko teh rêng, chhângtu tûr che an awm meuh vem? Mi thianghlim tu ber nge i pan dâwn teh rêng?

²Mi â chu vui reng chungin a thi a, Mi mâwl chu îtsîk nei reng chungin a boral ṭhîn.

³Mi â, inti ngêlnghet tak ka hmu a, Mahse, a chênna chu ânchhia ka lawh ta nghâl a.

⁴A fate chu an him hauh lo vang a, An tiduhdah ang a, Rorêlnaah chuan an chhan lo vang.

⁵Rilṭâmten a buhbâl an eisak ang a, Hlînga a hungte pawh. A hausakna chu mi duhâmten an ît ang.

⁶Tuarna hi vaivut aṭanga lo piang a ni lo va, Buaina pawh hi lei aṭanga chawr chhuak a ni lo.

⁷Meisî chung lama a chho zêl ang hian, Mihring hi buai tûr rênga lo piang a ni.

⁸Kei zawngin Pathian ka zawng ang a, Pathian hnênah ka chungthu ka thlen ang.

⁹Ani chu thil ropui tak, hriat phâk rual loh te, Thil mak chhiar sên rual loh te titu a ni.

¹⁰Lei chungah ruah sûrtîrin Lote chu tuiin a châwm ṭhîn.

¹¹Chutiangin mi tlâwmte chu a chawisâng a, Lungngaite chu a hnêm ṭhîn.

¹²Bum hmangte thil ruahman a tihlawhchham a, An thiltih a puitling lo vang.

¹³Mi fingte chu an fin vervêkna ngeiah an âwk a, Mi fing vervêk thil ruahmante chu engmahlovah a chantîr.

¹⁴An tân chhûn êngah khua a thim a, Chhûn laiah pawh zân ang maiin an dap dun dun.

¹⁵An kâa khandaih lakah retheite chu a hum a, Mi chak kut ata a chhan chhuak ṭhîn.

¹⁶Tichuan, retheite chu beiseina a neihtîr leh a, Mi sualte erawh chu an kâ a huhsak.

¹⁷Pathianin mi a thunun chu a nihlawh e, Chuvângin, Engkimtitheia thupêk chu ngainêp suh.

¹⁸Ani chuan a hliam a, a tuam leh ṭhîn. A kutin a tina a, a tidam leh ṭhîn a ni.

¹⁹Vawi ruk vawi sarih pawh buaina tâwk la, A chhan chhuak ang che a, Thil ṭha lo chuan a khawih lo vang che.

²⁰Ṭâmpui mitthiah a chhanhim ang che a, Indonaah pawh khandaih lakah a hum ang che.

²¹Ṭawng na tak lakah a vêng ang che a, Chhiatna lo thleng pawh i hlau lo vang.

²²Chhiatna lo thleng leh ṭâm tla chu i nuihsan mai ang a, Ram sakawlhte pawh i hlau lo vang.

²³Lovah lung a awm tawh lo vang a, Ram sakawlhte pawhin an rawn khawih lo vang che.

²⁴I puan inah râlmuang takin i awm ang a, I berâm huang i tlawh pawhin kim lo a awm lo vang.

²⁵I thlah tam tak i hmu phâk ang a, I rîla rahte chu ram hnim angin an tlim hmur ang.

²⁶A hun taka buhphal an seng angin Tarkûna damin thlânah i liam ve ang.

²⁷Ngaihtuah chiang teh, han chhût ngun la, Chutiang ngei chu a lo ni. Ngai ngun la, i ṭhat phah mahna.