Read Mizo Lushai Joba 6 Bible Online

Joba 6 - Mizo Lushai bible

Joba 6

¹Tin, Joba chuan a chhâng a:

²Ka manganna leh vanduaina hi teh theih ni se,

³Tuipui ṭiau aiin a rit zâwk ang, Chuvâng chuan, ka thu a bung a ni.

⁴Engkimtitheia thal chuan min chhun a, A tûr chuan mi fan chhuak a, Pathian hlauhnain ka khat ta.

⁵Ram sabengtung chu hlobet a peh laiin A hrâm ngai em ni? Bâwngpa pawh buhpâwl a ei Laiin a bû em ni?

⁶Hânna nei lo chu chi tel lovin a ei tlâk em ni? Artui pâwn vâr a hâng em ni?

⁷Chutiang chaw chu châkna rêng ka nei lo, Mi ngei hluah hluah a ni.

⁸Aw, ka dîl chu hmu thei teh ila, Pathianin ka duhzâwng chu min pe teh se.

⁹Pathianin mi râwtsawm vek duhin A kut thawhin min tan chhûm hmawk mah se,

¹⁰Chuti chung pawhin ka thla a la muang cheu vang, Mi zuah lovin na tuar nek mah ila, Ka lâwm zêl ang, Mi Thianghlima thu chu ka pênsan si lo va.

¹¹Thlâkhlelh tlâk chakna eng nge ka neih? Beisei leh chuan tûr nei si lovin engah nge ka dam reng?

¹²Lung anga sak em ka nih? Ka tisa pawh ngên ang em ni?

¹³Mahni inchhan thei rual ka ni ta lo, Ka thiltihtheihna a bo zo ta.

¹⁴Engkimtitheia hawisan mah se, Mangan tâwpah miin ṭhian ṭha an mamawh ṭhîn.

¹⁵Ka unaute erawh zawng, Kawrte rum anga bumhmang, Ṭhâla kangchat mai ṭhîn ang hi an ni.

¹⁶Luipui, vûr tuia dum kûk, Vûr tlang inphûm rûkna,

¹⁷Khua a lo luma tuirala, Nipuia kangchat ta ṭhîn ang hi an ni.

¹⁸Khualzinte chu tui zawngin an vâk kual an vâk kual a, Thlalêrah chuan vâkin an boral ṭhîn.

¹⁹Teman sumdâwng rualte pawhin an zawng a, Seba khualzinte phei chuan hmuh ngei an beisei ṭhîn.

²⁰Beisei taka an zawn chu an hlawhchham a, Hrilhhai takin an kal ta ṭhîn.

²¹Ka chungah chutiang chu in ni, Ka hrehawm tuar min hmu a, in hlau.

²²Thilpêk dîl che uin, ‘In sum leh pai a thlâwnin min pe teh u’ ka ti em ni?

²³Hmêlma kut ata min chhan chhuak tûrin emaw Ka ngên che u em ni?

²⁴Min zirtîr ula, ka lo ngaithla ang e, Ka dik lohna min hrilh teh u.

²⁵Thu dik hian mi a hneh ṭhîn, Mahse, min hnialna hi hnialhrât thu mai a ni lâwm ni?

²⁶Hnial hrât hrim hrima min ngaiin, Mangang taka ka thu sawi hi sawi mai maiah min ngai em ni?

²⁷Fahrahte chu in lilâm duh a, In ṭhian bulte meuh pawh in hralh duh ṭhîn.

²⁸Tûnah mi han en teh u, In hmaichhanah ka daw lo vang.

²⁹Lamlêt ula, thil dik lo ti suh u, Ka thu ngaihtuah ṭha rawh u, ka thu hi a dik a ni.

³⁰Ka sawiah hian eng nge dik lo awm? Thil ṭha lo chu ka thliar hrang thei lo vem ni?