Read Mizo Lushai Joba 7 Bible Online

Joba 7 - Mizo Lushai bible

Joba 7

¹Leiah mihring hi hna hahthlâk tak thawk tûr a ni lo vem ni? A damchhûng chu inhlawhfa ang maia thawk tûr a ni lâwm ni?

²Chhiahhlawh, tlai ni nêm nghâkhlel tak ang, Inhlawhfa, a hlawh tûr thlîr reng ang hi a ni.

³A thla têlin ka bei a dawng tial tial a, Zan tinin ka hah hluah hluah a ni.

⁴Ka han mu a, engtikah harh leh tak ang i maw ka ti a, Mahse, zankhuain ka let ka let a, Khawvâr hlân ka nghâkhlel êm êm.

⁵Ka taksa a pumin a pân lung nuai nuai a, A khir luai a, a khawk a, a hnai ṭuam ṭuam.

⁶Ka dam chhûng nite chu puantahtu khawhthei aiin a liam rang a, Beisei tûr nei lovin a liam mai ṭhîn.

⁷Ka nunna hi thli ang lek a nih hre reng la, Ka mit hian thil ṭha a hmu lo mai dâwn si.

⁸Tûna mi hmutu hian mi hmu tawh dâwn lo va, Min hmuh tum mah se hmuh tûr ka awm lo vang.

⁹Chhûm a kiang a, a ral ṭhîn ang hian, Thlâna lût tawh chu an kîr leh ngai lo ve.

¹⁰In lamah a lo hâwng tawh lo vang a, Tu man an hre reng tawh hek lo vang.

¹¹Chuvângin, insûmkâr lovin ka ṭawng ang a, Lungchhe takin ka sawi dâwn e, Rilru na takin ka phun dâwn a ni.

¹²Tuipui nge maw ka niha tuipui sakawlh? Min vêng tlat tûr i ruat tâk hi?

¹³Khumah ka mu hahdam ang a, muhîl ila, Ka na a nuam deuh mahna ka tih leh

¹⁴Nangin mang hlauhawm pui pui min neihtîr a, Thil râpthlâk tak tak min hmuhtîr si.

¹⁵Hetia na tuara dam reng ai chuan Reh hlum hial ka thlang zâwk e.

¹⁶Nun hi ka ning takzet a, Dam rei ka duh tawh lo, Min kalsan rawh u, mûmal ka nei tawh lo ve.

¹⁷Mihring hi eng nge maw a niha, i ngaihmawha, I ngaihsak hle le?

¹⁸Tûk tin i kana, Eng lai pawhin i fiah ṭhîn hi?

¹⁹Khaw dang hawi lo lêkin, chil lem chhûng takngial pawh Min en lovin i awm ngai em ni?

²⁰Nang, mihringte vêngtu, Ka sual a nih pawhin eng nge ka tihsuala, Ninawm khawpa min en bîk le?

²¹Engah nge ka bawhchhiatna i ngaihdam lohva, Ka khawlohna i lâk bo mai loh le? Kei zawng ka thi thuai dâwn a, Min zawng mah la, ka awm lo mai dâwn a ni.