Read Mizo Lushai Joba 8 Bible Online

Joba 8 - Mizo Lushai bible

Joba 8

¹Tichuan, Bildada, Sua mi chuan heti hian a sawi ve a:

²Eng chen nge hêng hi i sawi dâwn? I va han ṭawng rum ve?

³Pathianin a rêl tawh chu a tidanglam ngai em ni? Engkimtitheia chuan a dik chu a sawhsawn dâwn em ni?

⁴I fate a chungah an sual a nih chuan An sual man a tuartîr ang a.

⁵Tihtakzeta Pathian i zawna, Tihtakmeuhva Engkimtitheia i dîl chuan, Anin a rawn ngaihsak ngei ang che a, Mal a sâwm ngei ang che.

⁶Thianghlim leh dik taka i nun phawt chuan, A rawn ngaihsak ngei ang che a, Mal a sâwm bawk ang che.

⁷I bul ṭanna tê hle mah se, I hun hnuhnûngah tihropui i ni ngei ang.

⁸Hmânlai nite kha han dâwn kîr la, An pi pute thil hriatte kha chhui chiang teh,

⁹Nimina mi ang lek kan ni a, eng mah kan lo hre lo, Kan lei nun hi a tawi hle si a.

¹⁰Chûng mite chuan an lo zirtîr ang che a, An thil hriatte chu an lo hrilh ang che.

¹¹Chirhdûp lovah pumphîr a ṭo ngai em ni? Tui awm lohnaah phairuang a ṭo thei em ni?

¹²Sah tliah lohvin duah hle pawh ni se, Thlai dangte aiin a vuai hma ṭhîn.

¹³Pathian pawisa lote chu chutiang chuan an awm ang a, Pathian ngaihsak lote chu an beidawng ang.

¹⁴An innghahna chu a derdêp êm êm a, Maimawm rîl ang lek a ni.

¹⁵Chu chu nghêng sela a sâwt dâwn em ni? Vuan sela a tuar dâwn em ni?

¹⁶Mi sual chu, thlai, ni êng hmu ṭha, duah hluah hluah Pêng ṭuam ṭuam ang hi a ni.

¹⁷Lung keh kârah zung a thlâk a, Lungah chuan zung a kaih tlat a.

¹⁸Mahse, an pawh phawn hnu chuan Tu man a awmna rêng an hre tawh lo.

¹⁹Ngai teh, hei hi mi sual hlimna awm chhun chu a ni mai; Mi dangin a hmun an rawn luah dâwn a ni.

²⁰Ngai teh, Pathianin mi ṭha a paihthla lo vang a, Thil sual titute a tungding hek lo vang.

²¹Hlim takin a nuihtîr leh ang che a, Lâwm takin i awm leh ang.

²²I hmêlmate chu zakin an kun reng ang a, Mi suaksualte chênna in pawh a awm tawh lo vang.