Read Mizo Lushai Joba 9 Bible Online

Joba 9 - Mizo Lushai bible

Joba 9

¹Joba chuan heti hian a chhâng a:

²I sawite chu a dik tih ka hria. Mahse, Pathian mit hmuhin mihring hi a dik tâwk thei em ni?

³Pathian chu hnial dâwn ta sela, Vawi sângah vawi khat pawh a hnial hneh lo vang.

⁴Ani chu finnaa khat, engkim tithei a ni, Amah dodâl ṭhîn tu mah hmuingîl an awm ngai lo.

⁵An hriat loh hlânin tlângte a sawn a, A thinur chângin a tichhe ṭhîn.

⁶Lei chu a awmna hmunah a sâwi nghîng a, A nghahchhan bante chu a nghîng dur dur a,

⁷Ni chu thu a pe a, a chhuahtîr lo va, Arsite pawh a khuh vek a.

⁸Mahni chauhvin vân khi a kaipharh a, Tuifâwnte pawh a rap bet a.

⁹Zângkhua te, chhohreivûng te, siruk te, Chhim lam arsi bâwr te khi a siam an ni.

¹⁰Thil ropui chhui chhuah rual loh te, Thil mak chhui sên lohte titu a ni.

¹¹Ngai teh, ka bulah a lo kal a, ka hmu si lo, Min kal pêl a, ka hre si lo.

¹²A ni, a duh apiang a lâk pawhin tu nge dâl thei? ‘Eng nge i tih’ a hnênah tu nge ti ngam?

¹³Pathianin a thinur a sût lo vang, Rahab puitu, a hmêlmate chu a rapbet ang.

¹⁴Engtin nge kei tehlul hian ani chu ka chhân anga, Ka hnial thiam tehlul ang?

¹⁵Dik mah ila, ani chu ka chhâng lo vang, Ka chunga thuneitu chu khawngaih ka dîl zâwk ang.

¹⁶Ka au va, anin a lo hria a nih pawhin Ka thu a dawnsawn ka ring chuang lo.

¹⁷Thlipui hmangin min nuai nek a, Chhan awm lovin min hliam belhchhah a.

¹⁸Thaw la hman lêk lovin min siam a, Hrehawmna hlîrin ka khat ta.

¹⁹Chak zâwngah chuan tu nge tluk ang? Inkhing dâwn ila, tu nge do pha ang?

²⁰Sual inti lo mah ila, ka ṭawngkamin thiam loh mi chantîr a, Demawm lo ni mah ila, ka dik lohna a hmu tho vang.

²¹Sawisêlbo pawh ni ila, ka inngaisâng chuang lo, Ka nun hi ka ngainêp a ni.

²²Chuvâng alâwm, mi ṭha leh mi sual pawh Thuhmun vekin a tiboral dâwn ka tih hi.

²³Thil ṭha lovin thihna a thlentîr thut a, Mi dik mangang chu Pathianin a nuih ṭhîn.

²⁴Khawvêl hi mi sual kuta pêk a ni a, Rorêltute mit pawh tihdel a ni; A tih ni lo se, tu tih nge ni ang?

²⁵Ka damchhûng nite hi a liam thuai a, Thil ṭha tawng lovin a ral mai ṭhîn.

²⁶Lawng chak tak angin a kal liam a, Mupui sa hmu bir ang hian.

²⁷“Ka vuina hi ka theihnghilh ang a, Ka lungngaihna hlîpin ka intihlim teh ang, ka tih pawhin,

²⁸Ka tuarna zawng zawng avâng hian ka thla a phâng a ni, Nangnin mi sualah mi ngai si a.

²⁹Mi suala chhiar ka nih ahnu, Engah nge ṭûl lovah ka intihhah ang le?

³⁰Sahbawnin inbual fai mah ila, Ka kutte chingalin sil fai mah ila,

³¹Nangnin bawlhhlawh khurah min paih ang a, Ka silhfênte pawhin mi ten dâwn si.

³²Rorêlna hmaah han khing rual em ka nih? Ani zawng, kei anga mihring mai a ni ve si lo.

³³Kan pahniha chunga thu rawn neia, Kan inkâr thu pawtchat thei tu mah an awm si lo,

³⁴Min vuakna tiang chu la sawn sela, A ṭihbaiawmna chuan mi tihlau tawh suh se.

³⁵Tichuan, amah hlau lovin thu ka sawi ang a, Mahse, chutiang chuan ka awm thei si lo.