Read Mizo Lushai Sam 10 Bible Online

Sam 10 - Mizo Lushai bible

Sam 10

¹Aw LALPA, engati nge hla taka i awma, Mangan nia i bihrûk daih ṭhin le?

²Mi suaksualte chuan chapo takin retheite an tiduhdah ṭhîn a, An thang kam rûkah chuan anmahni âwk rawh se.

³Mi suaksual chuan a duhzâwng chu a uanpui a, Mi duhâm chuan LALPA hnâwlin a hmusit a.

⁴Mi suaksual chu a rilru a chapo va, Pathian a zawng lo va, A rilruin, “Pathian rêng a awm lo,” a ti ṭhîn.

⁵A thiltihte a hmuingîl zêl ṭhîn a, Pathian thil rêl dân a hre phâk lo va, A hmêlmate a nuihsawh ṭhîn.

⁶A rilruin, “Ka nghîng lo vang, Thil ṭha lo rêng ka tâwk hek lo vang,” a ti.

⁷Ânchhia te, dâwt te, vauna te a chhâk chhuak a, A ṭawng a chaltlai a, a hrâm tlahawlh hle.

⁸Khaw chhûng hmun kilkhâwrahte chuan mi a châng ṭhîn, Hmun fianrialah pawi khawih lote a that a, Chhantu nei lo a melh ru reng ṭhîn.

⁹Sakeibaknei angin bihrûkna remchângah a châng ru a, Retheite man tûrin a châng reng a, Retheite chu lêna manin a hnûk bo ṭhîn.

¹⁰A kûn a, a bawkvâk ṭhum ṭhum a, Vânduaite chu a hnehlâk ṭhîn.

¹¹A rilruin, “Pathianin pawi a ti lo vang, A inhup a, mi hmu hek lo vang,” a ti ṭhîn.

¹² LALPA, tho la, aw kan Pathian, i kut lek la, Retheite hi ngaihthah teh suh.

¹³Engtizia nge mi suaksualin Pathian a hmuhsita, “A rawn ngaihsak lo vang,” a tih rilrûk ṭhin le?

¹⁴Nang chuan i lo en reng si a, Tuar leh mangang i hmu vek a, Ṭanpui tûrin i inpeih reng si a. Rethei leh fahrah, i hnêna tlulûtte ṭanpui ṭhîntu i ni.

¹⁵Mi sualte bân chu tihtliahsak la, An sualna chu chhui chhuak vek la, Hmuh tûr awm tawh suh se.

¹⁶ LALPA hi zawng, kumkhaw Pathian a ni, A ram ata ring lote chu bo daih rawh se.

¹⁷Aw LALPA, retheite duhthusâm chu hria la, Rawn tiharh la, ngaihven ang che.

¹⁸Fahrahte leh hnehchhiahte chu dik takin rêlsak la, Lei mihringte zînga tu mahin an tihthlabâr tawh loh nân.