Read Mizo Lushai Sam 102 Bible Online

Sam 102 - Mizo Lushai bible

Sam 102

¹ LALPA, ka ṭawngṭai ngaithla la, Ka au thâwm hian i hnên lo thleng rawh se;

²Mangan laiin ka lakah hian i hmêl thup suh, I beng chhi la, ka au veleh min lo chhâng var ang che.

³Ka dam chhûng nite chu meikhu angin a zâm ral a, Thuk sa angin ka sa huai huai a ni.

⁴Hnim ah chhum vuai angin ka awm ta a, Chaw pawh ka ei thei lo.

⁵Mangang taka ka rûm ka rûm avângin Ruh hlîr ruh hlîr ka ni ta e.

⁶Thlalêra tuivalawng ang ka ni ta a, Khaw ram chhimbuk ang mai ka ni.

⁷In chung chhîpa chawngzawng fu fâl angin Ka hawi ka hawi a ni.

⁸Ka hmêlmaten min deu ni tin mai a, Min hualtute chuan an kamchhe tleuh nân tak min hmang.

⁹Chawa ka rin ber chu vut a ni a, Ka thil in pawh chu ka mittuiin a pawlh.

¹⁰Ka chungah hian i thinur chu a so nasa ta êm êm a, Min la lawk a, min paih sawn ta a ni.

¹¹Ka nunna chu tlaia hlim ral lam ang mai hi a ni, Hlobet angin ka vuai zo ta.

¹² LALPA, nang chuan chatuanin ro i rêl ang a, Ṭhangthar zêlten an hre reng bawk ang che.

¹³Tho la, Zion hi khawngaih ang che, Khawngaih a hun ta e, Hun tiam a lo thleng ta si a.

¹⁴I chhiahhlawhten a lungbangte an ngaina a, A chim rem rumte hi an lainat bawk a ni.

¹⁵Hnam dangte chuan LALPA hming hi an hlau vang a, Leia lal zawng zawngin i ropuina an ṭih bawk ang.

¹⁶ LALPAN Zion chu a din ṭha leh ang a, Ropui takin a lo lang ang.

¹⁷ LALPAN pachhiate ṭawngṭaina a ngaihsak ang a, An dîlna chu a hmusit lo vang.

¹⁸Hei hi ṭhang lo thar zêlte tân ziak la, La piang tûrten LALPA an fak theih nân.

¹⁹A hmun thianghlim sâng tak aṭang khian LALPAN a han thlîr a, Vân aṭangin lei hi a en a,

²⁰Lung in tângte rûm chu a han hria a, Thi tûra tihte chu a rawn chhan ta.

²¹Zion-ah LALPA hming hi hril ula, Jerusalem-ah pawh a fakna hla sa bawk rawh u.

²²Tichuan, mipui an lo pung khâwm ang a, Hnam tinrêngin LALPA rawng an bâwl ang.

²³Ka vânglai hun a titawi a, Ka nite chu a titlêm ta,

²⁴‘Aw ka Pathian, ka vânglaiin min la bo suh, Nang zawng kumkhuaa awm i ni si a,’ ka han ti a.

²⁵Nangin lei hi hmâna i siam a ni, Vân pawh i kutchhuak a ni e.

²⁶Mahse, an boral ang, nang erawh chu i awm kumkhua dâwn a, I hmaah chuan silhfên angin an chul ang a, Puan ang maiin i hluihlâwn ang a, An ral vek ang.

²⁷Nang erawh chu a ngai reng i ni a, I kumte chuan kin ni a nei lo vang.

²⁸Kan fate chu nangin i vêng ang a, An thlahte pawh him takin an awm ang.