Read Mizo Lushai Sam 103 Bible Online

Sam 103 - Mizo Lushai bible

Sam 103

¹Aw ka thlarau, LALPA chu fak la, Ka chhûnga awm zawng zawng hian a hming thianghlim chu fak rawh se.

²Aw ka thlarau, LALPA chu fak rawh, A ṭhatna zozai hi theihnghilh suh ang che.

³I bawhchhiatna tinrêng a ngaidam a, I natna zawng zawng pawh a tidam a,

⁴I nunna chu khur thûk ata a tlan chhuak a, Ngilneihna leh lainatnain min hual vêl ṭhîn.

⁵Thil ṭha tinrêng ka duh tâwk min pe a, Mupui angin kei pawh ka tuai thar ṭhîn.

⁶ LALPAN dik takin thil a ti a, Hnehchhiahte ro a rêlsak ta.

⁷Mosia hnênah a duhzâwng a hrilh a, A thiltihtheihzia Israel-te a entîr kha.

⁸ LALPA chu mi lainat ṭhîn, khawngaih thei tak a ni, Thinnel, ngilneihna ngah a ni.

⁹Mi sawisêl chîng tak a ni ngai lo va, A thinur lah a pai reng ngai hek lo.

¹⁰Kan sual angin kan chungah a ti lo va, Kan bawhchhiatna angin min thungrûl duh hek lo.

¹¹Lei aiin vân a sâng ang hian, Amah ṭihtute chungah chuan a ngilneihna a sâng a ni.

¹²Khawchhak leh khawthlang a inhlat ang hian, Kan khawlohna min dah sawnsak ta daih a ni.

¹³Pain a fate a lainat ṭhîn ang hian, LALPAN amah ṭihtute chu a lainat ṭhîn.

¹⁴Kan derthâwnzia a hre chiang a, Vaivut mai kan nih a hre reng a ni.

¹⁵Mihring nun hi zawng hlobet ang chauh a ni, Ram hnim pâr a lo vul ve a,

¹⁶Thliin a han chhêm a, A bo ta daih mai a, Hmuh tûr a awm tawh lo ang hi a ni.

¹⁷ LALPA ṭihtute tân a ngilneihna a ngai reng a, A ṭhatna lah an tuchhuan thleng pawhin a ngai reng ṭhîn,

¹⁸A thuthlung vawng rengtute leh A thupêk zâwm ṭhînte tân.

¹⁹ LALPAN vânah a lalṭhutthlêng a han rem a, Engkim chungah ro a rêl ta.

²⁰A thupêkte zâwma, a thute ngaithla ṭhîn, Vântirhkoh chak takte u, LALPA chu fak rawh u.

²¹A rawngbâwla, a duhzâwng ti ṭhîn Vâna mite u, LALPA chu fak rawh u.

²²A thuhnuaia awm zawng zawng leh A thilsiamten LALPA chu fak rawh se, Aw ka thlarau, LALPA chu fak rawh.