Read Mizo Lushai Sam 104 Bible Online

Sam 104 - Mizo Lushai bible

Sam 104

¹Aw ka thlarau, LALPA chu fak rawh, Aw LALPA, ka Pathian, i va ropui tak em! Ropuina leh chawimawinain i inthuam hi.

²Puan angin êng i sin a, Vân khi puan in angin i kai pharh a,

³I in chu chung lam tuiah khian i sa a, chhûm chu tawlailîrah i hmang a, Thli chungahte chuan i chuang bawk ṭhîn.

⁴Thli hi i tirhkoh a ni a, Kâwlphe de zawr zawr hi i chhiahhlawh a ni bawk.

⁵Nghîng lo tawp tûrin Lei hi i nghat tlat a.

⁶Puana tuam angin tui thûk takin a tuam vêl a, Tlâng chhîpte chu tuiin a chîm vek bawk.

⁷I han hau va, tui chu a tlânchhia a, I râwl i han chhuah chuan a liam zo ta vek a.

⁸Tlângahte a luang liam a, Kawrahte chuan a luang thla a, A awmna tûr i ruatah chuan.

⁹A pelh loh tûr ramri i khamsak a, Lei hi a chîm pil leh loh nân.

¹⁰Tuihna leh lui i tichhuak a, Tlâng kârahte an luang ta a.

¹¹Ramsa tinrêngte chuan an lo tlân a, Ram sabengtung tuihâlte chuan an dâwt.

¹²A kamah chuan chunglêng savaten bu an chhep a, Hnimbuk zîngahte chuan an hrâm bawk a.

¹³I chênna hmunsâng aṭangin Tlângah ruahpui i sûrtîr a, Lei chu malsâwmnain i tikhat ta.

¹⁴Ran peh atân hnim a lo chawr a, Mihring tân thlaite a lo ṭiak a, Leiah ei tûr buh a lo awm ta.

¹⁵A intihhlimna tûr uain a thar bawk a, Hriak pawh a sa timâm tûrin, A rin tûr chaw a nei ta a.

¹⁶ LALPAN a phun Lebanon tlâng sidar thing chuan A duhtâwk tui a hmu.

¹⁷A zârah savaten bu an chhep a, Vachate chuan fâr lêrah bu an nei.

¹⁸Sathârte chu khâm sângah an chêng a, Khâm pûkah chuan sangawite an biru.

¹⁹Thla chu a hun bi-ah a de ṭhîn a, Ni pawh a hun takah a tla bawk ṭhîn.

²⁰Khua a thim a, zân a lo ni a, Ramsa tinrêng an tla chhuak a.

²¹Sakeibaknei vânglai sa seh tûr chu a hâhum a, Pathian hnênah ei tûr a ngên.

²²Ni a lo chhuak a, an ṭîn dial a, An awmna ṭheuhvah chuan an bawk leh ṭhîn.

²³Hna thawk tûrin mihring a lo chhuak a, Tlai thlengin hna a thawk ṭhîn.

²⁴ LALPA, i thil siam hi a va tamin I va siam thiam tak em! Lei hi i thilsiamin a khat a ni.

²⁵Tuifinriat saw a ropuiin a va zau tak êm! Thil nung chhiar sên lohte an awm a, Lian tak tak te, tê tak takte an ni.

²⁶Tah chuan lawngte an lêng noh noh bawk a, I siam Leviathan chu a lêng zuai zuai bawk a.

²⁷An vaiin i mitmei an en a, A hun takah ei tûr i pe ziah ṭhîn.

²⁸An chaw tûr i pe a, an ei a, Thil ṭha tinrêng i kut ata an duhtâwk an dawng ṭhîn.

²⁹I hmêl i han thup chuan an mangang a, An thaw i tihtâwp chuan an thi mai a, Vaivutah bawk an kîr leh ṭhîn.

³⁰Nangin i han thâwkkhum a, an nung ta mai a, Ram pawh hi i titui ṭhîn.

³¹ LALPA chu chatuanin ropui sela, LALPA chu a thilsiamah hlim bawk rawh se.

³²Lei hi a han melh chuan a khûr ṭhîn a, A han khawih chuan tlângte a tuiral ṭhîn.

³³Ka dam chhûngin LALPA fakin ka zai ang a, Pathian chu, ka nun chhûng zawng ka fak bawk ang.

³⁴Ka ngaihtuahte hi a lâwmzâwng ni sela, LALPA-ah chuan ka lâwm si a.

³⁵Mi sualte chu lei aṭang hian boral sela, Mi suaksualte awm tawh suh se, Aw ka thlarau, LALPA fak rawh. LALPA chu fak rawh u.