Read Mizo Lushai Sam 105 Bible Online

Sam 105 - Mizo Lushai bible

Sam 105

¹ LALPA chu lâwmthu hrilh ula, A hming lam rawh u, A thiltih hi hnam tinrêng hrilh rawh u.

²Amah fakin zai ula, Thil mak a tih zawng zawng hi hril rawh u.

³A hming thianghlim hi chhuang ula, LALPA zawngtute chu hlim hle rawh se.

⁴ LALPA chu zawng ula, a chakna dîl rawh u, Ani chu pan fo rawh u.

⁵A thiltih ropui tak te, A thil mak tih leh a rorêl dân te,

⁶Aw, a chhiahhlawh Abrahama thlahte u, A thlan Jakoba fate u, hre reng rawh u.

⁷Ani chu LALPA kan Pathian a ni a, Khawvêl pum puia rorêltu a ni.

⁸A thuthlung chu a hre reng a, Chhuan sâng thlengin a thupêk pawh a hre reng bawk.

⁹Abrahama hnêna a thuthlun leh Isaka hnêna a thutiam chu a hre reng a ni.

¹⁰Chûng chu Jakoba thlahte tân dânah a nemnghet a, Israel-te kumkhaw thuthlung atân.

¹¹“Khai le, Kanan ram hi ka pe ang che u, Ro atân in nei thliah ang,” a ti a.

¹²Eng tham ni lo, mi tlêm tê Mikhual mai an la nih lai pawh khân.

¹³Hnam tinrêng zîngah vâkvaiin Ram tinah an pêm lâwr a,

¹⁴Mahse, tu ma nêkchêp a phal lo va, Anmahni avângin lalte a zilh zâwk a.

¹⁵‘Ka hriakthiha khawih suh ula, Ka zâwlnei hi a pawi khawih hek suh u,’ a ti.

¹⁶Ram pum puiah ṭâmpui mitthi a thlentîr a, An buh zawng zawng a tihchhiatsak vek kha.

¹⁷An hmaa kal tûrin mi a tîr a, Bawiha an hralh Josefa kha.

¹⁸A ke-ah chuan kawl an buntîr a, A nghâwng thîr khaidiatin an hrêng.

¹⁹A sawi lâwk ang ngei khân a thleng ta a, LALPA thu chu a dikzia a lang ta.

²⁰Aigupta lalber chuan a chhuahtîr ta a, Chu hnam hotu ngei chuan a chhuahtîr ta.

²¹A ram hotu-ah a siam a, A neih zawng zawng chunga thuneituah a dah ta a.

²²A mi liante a duh duha thunun tûr leh An upate finna zirtîr tûrin.

²³Israela chu Aigupta ramah a chhuk ve a, Chumi ram chuan Jakoba chu a lo mikhual.

²⁴ LALPA mite chu an pung chak ta hle a, Anmahni ertute ai chuan an chak ta a.

²⁵Chûng mite rilru chu a inthlâk a, A mite chu an haw ta a, A chhiahhlawhte chu vervêk takin an chawk nawmnah ta a.

²⁶A chhiahhlawh Mosia chu a tîr thla a, A mi thlan Arona nên.

²⁷Pathian thil mak tih chu an entîr a, Aigupta ramah thil mak tak tak an ti.

²⁸Khua a tithim a, ai mit thlawn ang mai a ni ta. An thiltihte an hmu thei ta lo va.

²⁹An luite thisena chantîrin An sanghate a tihlum zo ta a.

³⁰An ramah chuan chungu a puantîr a, Lal in chhûngahte pawh an awm noh noh.

³¹Thu a pe a, thosi a puang a, An ram chhûngah thophurh a khat ta a.

³²Ruah aiah rial a tlâktîr a, An ram pumah ṭêk a tla bawk.

³³An grep leh theipui chu a chhu chhia a, An ram chhûnga thingte a dêng tliak zo.

³⁴Thu a pe a, khau a puang a, Chhiar sên loh khauphâr rual an kat noh noh.

³⁵An ram chhûnga hnimhnah an ei zo va, An thlai chînte an ei kawlh vek.

³⁶Ram pum puiah an fa tîrte a tihhlumsak vek a, An vânglai fate chu.

³⁷Tangka leh rangkachak nên a hruai chhuak a, An zînga mi tu mah sil an awm lo.

³⁸Aigupta mite chuan an hlau va, An chhuak ta chu an lâwm hle a.

³⁹A hliap tûrin chhûm a zîntîr a, Zâna ên tûrin mei a chhi.

⁴⁰An ngen angin vahmîm rual a lo ṭum a, An tlai tâwkin vân chaw a pe.

⁴¹Lungpui a tikhi a, Tui a lo luang chhuak ta a, Ram rovah chuan lui a luang ta.

⁴²A chhiahhlawh Abrahama hnêna, A thutiam thianghlim chu a la hre reng a ni.

⁴³Tichuan, a mite chu a hruai chhuak a, Hlim leh lâwmin an au va.

⁴⁴Hnam dangte lo awmna ram chu a pe a, Chûng mite thawh rah chu an rochung ta:

⁴⁵A thupêkte an zâwma, A Dânte chu an zawm theih nân. LALPA chu fak rawh u.