Read Mizo Lushai Sam 106 Bible Online

Sam 106 - Mizo Lushai bible

Sam 106

¹ LALPA chu fak rawh u, LALPA chu a ṭhat êm avângin lâwmthu hrilh rawh u, Ngil a nei kumkhua si a.

²Tu nge LALPA thiltih ropuizia hi sawi thei anga, A fakawmzia hril sêng ang le?

³Eng lai pawha dik taka awma, Thil ṭha ti ṭhînte chu an nihlawh e.

⁴ LALPA, i mite chunga ṭhat i chhuah hunah min hre reng la, I chhan chhuah hunah chuan min telh ve ngei ang che;

⁵I thlante nihlawhna hmua, I hnam thlante lâwma ka hlimpui theih nân leh, I rochanten an chhuan che anga Ka chhuan ve theih nân che.

⁶Kan pute ang bawkin thil kan tisual a, Kan khawlo va, kan sual a ni.

⁷Aigupta ramah khân kan pute chuan, I thil mak tih an hrethiam duh lo va, I ngilneih nasatzia pawh an hre duh lo, Tuipui Sen kamah khân an hel tâk kha.

⁸Mahse, i hming avângin i chawimawi a, I thiltihtheihziate i hriattîr tho a ni.

⁹Tuipui Sen chu thu a pe a, a chat ta a, A mite chu leichârah chuan a kal tlangtîr ta a.

¹⁰Anmahni hawtute kut ata chu a chhan chhuak a, An hmêlmate kut ata ngei chu.

¹¹Tui chuan an hmêlmate a chîm pil a, Pakhat tê mah dam chhuak an awm loh kha.

¹²A mite chuan a thu an ring ta a, A fak nân hla an sa.

¹³Mahse, a thiltihte an theihnghilh leh ta thuai a, A remruat chu an ngaichâng duh leh ta lo.

¹⁴Thlalêrah an râwp ta êm êm a, Ram rovah chuan Pathian an fiah ta a.

¹⁵An dîl ngei chu a han pe a, An râwp a tihrehsak ta a.

¹⁶Mahse, Mosia leh mi thianghlim Arona chu, An riahna hmunah chuan an îtsîk ta a.

¹⁷Lei a khi chat phuk a. Dathana chu a tla ta a, Abirama pawh, a hote nên, an pil zo ta.

¹⁸An zîngah chuan mei a lo chhuak a, Mi sualte chu an kâng hlum ta vek a.

¹⁹Horeb tlângah pawh khân bâwngno lem an din a, An thil chhûn chu an be ta a.

²⁰An ropuina Pathian chu Hnim pet, bâwng ang lekah an chan ta a.

²¹Aigupta rama thil ropui tak tak titu, An chhandamtu Pathian an theihnghilh ta.

²²Aigupta ram chhûnga a thil mak tih te leh, Tuipui Sena thil râpthlâk tak a tihte pawh.

²³A mi thlan Mosia chuan, A thinur tireh tûrin An kâra bân pharin ngensak lo se chu Tihboral vek a tum tâk kha.

²⁴A thutiam chu an rin tâwk loh avângin, Ram duhawm tak chu an ngainêp a.

²⁵An puan inah chuan an phunnawi a, LALPA aw chu an ngaithla duh ta lo.

²⁶Bân phar meuhvin thu a tiam a, “Thlalêrah in tlu hlum ang a,

²⁷Ram dang daihah ka tidarh ang che u a, Hnam dang zîngah in thlahte an thi ang,” A ti ta hial a ni.

²⁸Peor-ah khân Baal an bia a, Milem pathian hnêna inthawina sa an ei ve ta.

²⁹An thil tih chuan ani chu a tithinur a, An zîngah chuan hripui a lêng ta a.

³⁰Finehasa chu a tho va, ngaihdam a dîlsak a, Hri chu a reh thei ta.

³¹Chu chu a thil tih ṭhaa ngaih a ni ta a, Kumkhuaa ṭhangtharten an hriat zêl tûrin.

³²Meriba tuiah LALPA an tithinur leh a, Anmahni avângin Mosia meuh pawh a buai ta a.

³³Ani chu an tithinur a, Thu hnu dâwn lovin a ṭawng ta a.

³⁴ LALPAN tihlum tûra thu a pêk angin Chûng rama awmte chu an tihlum duh lo.

³⁵Chûngho nên chuan an inneih pawlh ta a. An tih dânte chu an zir ve ta zâwk a ni.

³⁶An milemte an be ve ta a, Thangah an âwk ta a ni.

³⁷An fanu te, an fapa te, Ramhuai hnêna inthawi nân an hmang ta a.

³⁸Pawi khawih lo thisen chhuah an chîng a, Kanan mite milem hnênah thisen an hlân a, An fanu te, an fapa te thisen chuan Ram chu an tibawrhbâng zo ta.

³⁹An thiltih avâng chuan an bawlhhlawh zo ta a, An thil chîn avâng chuan an uire zo ta a ni.

⁴⁰A mite chungah LALPA thin a thawk a, A rochante chu a ten ta êm êm a.

⁴¹Hnam dang hnênah a pe a, Anmahni hawtuten an chungah ro an rêl ta a,

⁴²Hnam dangten an rap bet a, An thuhnuaiah an kûn ta a ni.

⁴³Vawi tam tak chu a chhan chhuak a, Mahse, an hel lui zêl a, An sualnaah chuan an pil ta a ni.

⁴⁴Mahse, an han mangan meuh chuan a ngaihsak a, An au thâwm chu a lo ngaithla ṭhîn.

⁴⁵Anmahni avângin a thuthlung a hre reng a, Ngil a neih êm avângin pawi a ti ṭhîn.

⁴⁶Sala mantu zawng zawngte chu Anmahni a khawngaihtîr fo ṭhîn.

⁴⁷Aw LALPA, kan Pathian, min chhan chhuak la, Hnam dang zîng ata hi min hruai khâwm leh ang che. I hming thianghlim kan fak ang a, Ropui takin kan chawimawi bawk ang che.

⁴⁸ LALPA, Israel-te Pathian chu fak rawh u, Chatuan chatuanin fak ula, Mi zawng zawngin, ‘Amen,’ ti rawh se. LALPA chu fak rawh u.