Read Mizo Lushai Sam 107 Bible Online

Sam 107 - Mizo Lushai bible

Sam 107

¹“LALPA chu a ṭhat êm avângin lâwmthu hrilh rawh u, Ngil a nei kumkhua si a,”

² LALPA tlanten ti fo rawh se. Hmêlma kut ata chu a tlan chhuak ta si a;

³Ram tina mi a hruai khâwm a, Chhak leh thlang, Chhim leh hmâr aṭangte chuan.

⁴Thlalêr ram rovah te an vâk an vâk a, An chênna tûr khua chu an hmu zo lo.

⁵Rilṭâm leh tuihâlin An beidawng êm êm ṭhîn.

⁶Harsatna an tawhin LALPA an au ṭhîn a, An manganna ata a chhan chhuak ṭhîn.

⁷Kawng dik takah a hruai ta a, An chênna tûr khua chu an thleng thei ta.

⁸ LALPA chu a ngilneih êm avângin fak rawh u, Mihringte tân thil mak a tih ṭhin avângin.

⁹Tuihâlte chu an duh tâwkin a intîr a, Rilṭâmte pawh ei tûr tui tak takin a hrai puar ṭhîn.

¹⁰Ṭhenkhatte chu thim zîngah ngui takin an awm a, Hrehawm tuarin thîr kawl an bun.

¹¹Pathian thu awih lova, Chungnungbera remruat an hmuhsit avângin.

¹²Rim takin a thawhtîr a, a tudawl ta a, An tlûk pawhin ṭanpuitu an nei lo.

¹³Harsatnate an tawhin LALPA an au ṭhîn a, An manganna ata a chhan chhuak ṭhîn.

¹⁴Thim zînga ngui taka an awm chu a hruai chhuak a, An khaidiat bunte chu a tihchahsak bawk ṭhîn.

¹⁵ LALPA chu a ngilneih êm avângin fak rawh u, Mihringte tân thil mak a tih ṭhin avângin.

¹⁶Dâr kawngkhârte a chhu chhia a, A kalhna thîr tlâwnte a tibung bawk.

¹⁷Ṭhenkhatte chu an â hle a, An sual avâng leh an bawhchhiatna avânga tuar an ni.

¹⁸Ei tûr tinrêngin a ngei a, Thlân kotlângah an dâk.

¹⁹Harsatna an tawhin LALPA an au ṭhîn a, An manganna ata a chhandam ṭhîn.

²⁰Thu a pe a, a tidam a, Thlân ata chu a chhan chhuak ṭhîn.

²¹ LALPA chu a ngilneih êm avângin fak rawh u, Mihringte tân thil mak a tih vângin.

²²A hnênah lâwmthu sawi inthawina hlân ula, A thiltihte hlain hril vêl rawh u.

²³Ṭhenkhatte chu tuifinriatah lawnga chuangin, Tuipui zauvah ei an zawng a.

²⁴ LALPA thiltihte chu an han thlîr a, Tui thûk taka a thil mak tihte chu.

²⁵Thu a pe a, thlipui a tleh ta a, Tuifinriat chu nasa takin a tifâwn a.

²⁶Lawng chu sâng tak takah a vawrh chho va, A chhuk leh vung vung ṭhîn, A hlauhawm êm avângin an thlabâr ṭhîn.

²⁷Zu rui pai pai, thle thle ang hi an ni, A tihngaihna rêng an hre ṭhîn lo.

²⁸Harsatna an tawhin LALPA an au ṭhîn a, An manganna ata a chhan chhuak ṭhîn.

²⁹Thlipui tleh chu a tibâng a, Tuifâwnte chu a reh ta a.

³⁰A reh tâk avângin an hlim ta êm êm a, An thlen châk hmun nuamah chuan a hruai thleng ṭhîn.

³¹ LALPA chu a ngilneih êm avângin fak rawh u, Mihring tân thil mak a tih avângin.

³²A mite pung khâwm zîngah chawimawi ula, Upa rual ṭhu khâwm zîngah amah chu fak rawh u.

³³ LALPAN luite chu thlalêrah a chantîr a, Tuihna awmna pawh ram rovah a chantîr bawk.

³⁴Ram ṭha tak chu a mi chêngte sual avângin, Ram chhiaah a chantîr a.

³⁵Thlalêr chu dîlah a chantîr a, Ram ro chu tuihna awmnaah a chantîr bawk.

³⁶Tah chuan mi ṭâmte chu awmhmun a khuartîr a, An chênna tûr khawpui an din.

³⁷Thlai an chîng a, grep an phun a, A rah ta tiar tuar mai a ni.

³⁸Mal a sâwm a, an pung chak êm êm a, An rante pawh a riral ve ngai lo.

³⁹Hnehchhiahna nasa tak leh tihduhdahna avângin An ral tial tial a, an kun ta tlawk tlawk a ni.

⁴⁰Mahse, miliante hmusita, Kawng awm lova vahvaihtîrtu chuan,

⁴¹An tihretheih mangangte chu a chawi kâng a, An chhûngkuate a tipung leh ta a.

⁴²Mi dikte chuan an han hmuhin an hlim ta êm êm a. Mi sualte erawh chu an ngawi hmak mai.

⁴³Mi â lo chuan hêng hi chhût ngun sela, LALPA ngilneihzia hi hre chiang teh se.