Read Mizo Lushai Sam 109 Bible Online

Sam 109 - Mizo Lushai bible

Sam 109

¹Aw, ka fak Pathian, ngawi reng teh suh,

²Mi sual leh bum hmangten min bei luai luai a, Dâwtin min hêk min hêk si a.

³Thu huatthlala pui pui min sawi khum a, Chhan awm lovin min bei.

⁴Keiin ka hmangaih a, annin min do, An tân ka ṭawngṭai ṭhîn.

⁵Thil ṭha chu sualin min thungrûl a, Ka hmangaih a, annin min haw thung a.

⁶Ani chungah chuan rorêltu tûr mi sual ruat la, A ding lamah Setana ding rawh se.

⁷A chungthu rêl sela, thiam loh chang ngei rawh se, A ṭawngṭaina chenin suala ngaih ni rawh se.

⁸A dam chhûng nite chu tihtawi ni se, A hotu nihna chu mi dangin chang rawh se.

⁹A fate chu fahrahin awm sela, A nupui chu hmeithai rawh se.

¹⁰A fate chu vâkvaiin kutdawh sela, An in ram aṭangin hnawh chhuah ni rawh se.

¹¹A neih zawng zawng a ba aiah pûktîrtuten la vek sela, A thawhrim rah pawh ram dang miten rawk bawk rawh se.

¹²Lainattu rêng tu mah nei lo sela, A fa, pa nei ta lote chu tu man khawngaih suh se.

¹³A thlahte pawh mang vek sela, Ṭhangthar lo awm tûr zîngah a hming dai hlen daih se.

¹⁴A pa bawhchhiatna chu LALPAN hre reng sela, A nu suahsualna pawh thai bo ni hek suh se.

¹⁵An sualna chu LALPAN chhinchhiah sela, Khawvêlah hian anmahni hriatrengna eng mah awm hauh suh se.

¹⁶Ngilneih nachâng rêng a hre lo va, Rethei, pachhia leh mangang te, An thih thlengin a ûm zui ṭhîn.

¹⁷Ânchhe lawh chîng tak a ni, ama chungah tla zâwk rawh se. Mi dang a duhsak ngai lo va, duhsakna dawng suh se.

¹⁸Ânchhia chu kawr angin a ha a, Tui ang maiin a taksa a fan chhuak a, Hriak ang maiin a ruhte pawh a fan chhuak a.

¹⁹Puana tuam ang maiin ani chu tuam sela, Kâwnghrên angin a taiah hrêng rawh se.

²⁰Hêng hi min hêktute, LALPAN a thungrulhna chu ni sela, Min sawichhetute chan chu ni rawh se.

²¹Aw LALPA, nang chu ka LALPA i ni a, I hming avângin min ṭanpui la, Ngil i neiin i ṭha si a, min chhan chhuak ang che.

²²Kei zawng rethei tak leh tlachham tak ka ni, Ka thinlung hi a na êm êm ṭhîn.

²³Tlai lam hlim angin ka ral tial tial a, Khau anga len bovin ka awm a, Ka vânglai a liam a, ka lo tar ta.

²⁴Chaw nghei vângin ka tha a khûr ta a, Thau viau ṭhîn kha ka chêr zo ta.

²⁵Mi nuihzatbûr ka ni a, Min han hmuhin an lu min thin khum ṭhîn.

²⁶Aw LALPA, ka Pathian, min ṭanpuitu i ni, I ngilneih êm avângin min chhandam rawh.

²⁷Chu chu i tih a nih hriattîr hlawm la, LALPA, nangma tih ngei a ni.

²⁸Annin ânchhia min lawh mah se, Nangin mal min sâwm a, Min bei mah se an mualpho vang a, I chhiahhlawh hi ka hlim thung ang.

²⁹Mi khingtuten mualphona kawr ha se, Zahna puanin inkhuh rawh se.

³⁰ LALPA chu lâwmthu ka hrilh mawlh mawlh ang a, Mipui zîngah ka fak bawk ang.

³¹ LALPAN pachhia chu a ṭan a, Ani chu thiam loh chantîrtute lakah a chhan chhuak ṭhîn.