Read Mizo Lushai Sam 115 Bible Online

Sam 115 - Mizo Lushai bible

Sam 115

¹ LALPA, keini ni lovin, keimahni ni hek lovin, I hming chauh hi chawimawi ang che. I ngilneih leh i rinawm êm avâng hian.

²Engati nge hnam dangte chuan, ‘An Pathian chu khaw nge a awm?’ an tih vei ni.

³Kan Pathian chu vânah a awm, A duh apiang a ti mai ṭhîn a ni.

⁴Milemte chu tangka leh rangkachaka siam an ni a, Mihring kutchhuak mai an ni e.

⁵Kâ an nei a, an ṭawng thei si lo va, Mit an nei a, an hmu thei bawk hek lo.

⁶Beng an nei a, an hre thei miah lo va, Hnâr an nei a, thil rim an hre thei lo.

⁷Kut an nei a, an khawih thei si lo va, Ke an nei a, an kal thei bawk hek lo, Aw pawh an chhuah thei lo.

⁸Milem siamtute chu milem ang lek an ni a, Milem ringtute pawh milem ang chauh an ni.

⁹Aw Israel-te u, LALPA hi ring rawh u, Ṭanpuitu leh phaw a ni e.

¹⁰Arona thlahte u, LALPA hi ring rawh u, Nangmahni ṭanpuitu leh in phaw a ni.

¹¹ LALPA ṭihtute u, LALPA hi ring rawh u, ṭanpuitu leh phaw a ni e.

¹² LALPAN min hre reng a, mal min sâwm ang, Israela thlahte mal a sâwm ang a, Arona chhûngte pawh a sâwm bawk ang;

¹³ LALPAN amah ṭihtute chu, a lian a têin, Mal a sâwm ang.

¹⁴ LALPAN nasa takin tifing che u rawh se, Nangmahni leh in fate nên.

¹⁵Lei leh vân siamtu LALPA chuan Malsâwm che u rawh se.

¹⁶Vân khi LALPA vân a ni a, Lei hi mihringte tân a pêk a ni.

¹⁷Mitthite chuan LALPA an fak thei lo, Ngawih rengna rama chhuk tâte chuan.

¹⁸Keini zawngin LALPA kan fak ang a, Tûn aṭanga chatuan thlengin, LALPA chu fak rawh u.