Read Mizo Lushai Sam 116 Bible Online

Sam 116 - Mizo Lushai bible

Sam 116

¹Khawngaih ka dîlna aw a ngaihthlâk avângin LALPA chu ka ngaina a ni.

²Ka koh apiangin a lo ngaithla ṭhîn.

³Thih hlauhna chuan min rawn chîm a, Seol hlauhawmna chuan mi rawn tuam a, Mangang leh lungngai takin ka awm.

⁴Tichuan, LALPA hming chu ka han lam a, Aw ‘LALPA, min chhan chhuak teh,’ tiin.

⁵ LALPA chuan ngil a nei a, a ṭha a ni, Pathian hi zawng, mi lainat thei tak a ni.

⁶ LALPAN ṭanpui ngaite a pui ṭhîn a, Ka chan a chauh laiin min rawn chhan chhuak.

⁷Aw ka nunna, thlamuang takin awm leh tawh rawh, LALPA chu ka chungah a ṭha êm êm si a.

⁸Ka nunna hi thihna lakah, Ka mitte hi mittui lakah, Ka kete hi tlûkna lakah I chhan chhuak ta si a.

⁹Tichuan, LALPA hmaah ka lêng thei ta, Mi nungte ramah chuan.

¹⁰‘Ka va rethei tak êm!’ ka tih lai pawhin, Amah ka ring tlat a.

¹¹‘Tu mah rin tlâk an awm lo ve,’ Thlaphâng taka ka tih laite pawh khân.

¹²Ka tân a ṭhat êm avang hian LALPA chu eng nge ka pêk ve ang?

¹³Chhandamna no ka keng ang a, LALPA hming chu ka lam ang.

¹⁴ LALPA hnêna ka thutiam chu ka hlen ngei ang, A mite zawng zawng hmaah chuan.

¹⁵Amah ngaihsaktute thihna chu, LALPA ngaihin hlu tak a ni.

¹⁶Aw LALPA, kei zawng, i bawih, i chhiahhlawh ka ni a, I bawihnu fapa ka ni, Min phuarnate i rawn phelh ta.

¹⁷Lâwmthu sawi inthawina ka hlân ang che a, LALPA, i hming ka lam bawk ang.

¹⁸ LALPA hnêna ka thutiam chu ka hlen ngei ang, A mite zawng zawng hmaah chuan.

¹⁹ LALPA biak in tualzâwl, Jerusalem laiah ka hlen ngei ang. LALPA chu fak rawh u.