Read Mizo Lushai Sam 118 Bible Online

Sam 118 - Mizo Lushai bible

Sam 118

¹ LALPA chu a ṭhat êm avângin fak rawh u, Ngil a nei kumkhua si a.

²Israel mite chuan, ‘Ngil a nei kumkhua si a,’ ti ngei rawh se.

³Arona thlahte chuan, ‘Ngil a nei kumkhua si a’ ti hlawm rawh se.

⁴ LALPA ṭihtute chuan, ‘Ngil a nei kumkhua si a,’ ti bawk rawh se.

⁵Ka mangang a, LALPA chu ka han au va, LALPA chuan min lo chhâng a, min tizalên ta a.

⁶ LALPA chu ka lamṭang a ni a, ka hlau lo vang, Mihringin eng nge min tih theih ang?

⁷ LALPA chu ka lama ṭang, min ṭanpuitu a ni, Min hawtute diriam takin ka la en ang.

⁸Mihring rinchhan ai chuan LALPA hnêna tlûkluh a ṭha zâwk a,

⁹Milian rinchhan ai chuan LALPA hnênah tlûkluh a ṭha zâwk.

¹⁰Hnam dangte chuan min rawn hual a, Mahse, LALPA hmingin ka titlâwm ta.

¹¹Min rawn hual tuau tuau va, Mahse, LALPA hmingin ka titlâwm ta.

¹²Khuai rual angin min rawn bawh a, Mahse, LALPA hmingin ka titlâwm ta.

¹³Min rawn nawr sawk sawk a, Ka tlu ṭhelh a; mahse, LALPAN min ṭanpui ta.

¹⁴ LALPA chu ka chakna leh ka hla, Min chhandamtu a ni.

¹⁵An bûka Pathian mite hnehna lâwma au thâwm chu ngai rawh u, ‘LALPA kut ding lam chuan a hneh ta a,

¹⁶ LALPA kut ding lam chawimawi a ni a, LALPA kut ding lam chuan thil ropui tak a tih tâk hi,’ an ti.

¹⁷Ka thi lo vang, ka dam ang a, LALPA thil tih ka hril ngei ang.

¹⁸ LALPAN min thunun na hle a, Mahse, ka thih êm zawng a phal lo ve.

¹⁹Tempul kawngkhâr chu mi hawn rawh u, Ka lût ang a, LALPA hnênah lâwmthu ka sawi dâwn a ni.

²⁰Hei hi LALPA kawngkhâr chu a ni, Mi dikte chu an lût thei ang.

²¹Min chhan avângin ka fak a che, Min chhanchhuaktu i ni.

²²Insatute lung hnâwl tâk kha, A kil lung pawimawh ber a lo ni si.

²³Chu chu LALPA tih a ni e, kan hmuhin a mak kan ti.

²⁴Vawiin hi LALPA ni ruat chu a ni, Hlimin i lâwm ang u.

²⁵Aw LALPA, min chhandam teh, Aw LALPA, min hlawhtlintîr ang che.

²⁶ LALPA hminga lo kal chu an nihlawh e, LALPA in aṭang hian mal kan sâwm a che u,

²⁷ LALPA chu Pathian a ni a, kan chungah a lo êng ta! Chhâwl keng ila, maichâm thlengin kawng i zawh ang.

²⁸Ka Pathian i ni a, lâwmthu ka hrilh ang che, Aw ka Pathian, ka chawimawi chiam ang che.

²⁹ LALPA chu a ṭhat avângin fak rawh u, Ngil a nei kumkhua si a.