Read Mizo Lushai Sam 119 Bible Online

Sam 119 - Mizo Lushai bible

Sam 119

¹Sawisêlbote chu an nihlawh e, LALPA Dân zâwmtute chu.

²A thupêk zâwmtute chu an nihlawh e, Tihtakmeuhva zawngtute chu.

³Anni chuan thil sual an ti ngai lo va, A kawngah an kal ṭhîn.

⁴I thuruatte chu min pe a, Zâwm ngei tûrin min ti.

⁵I dânte chu Rinawm taka zâwmtu ni thei teh ila aw!

⁶I thupêk zawng zawng zâwm ila, Ka mualpho tawp lo vang.

⁷I rorêl dikzia ka hriat hunah Thinlung dik takin ka fak ang che.

⁸I dân chu ka zâwm ang a, Min kalsan suh ang che.

⁹Tleirâwlten engtin nge an awm dân an vawn thianghlim ang? I thute zâwmin.

¹⁰Theihtâwp chhuahin ka zawng che a, I thute ka pênsan phal lul suh.

¹¹I chungah thil sual ka tih loh nân, I thu ka thinlungah ka vawng tlat a.

¹² LALPA, fak tlâk i ni, I dânte min zirtîr rawh.

¹³I kâa thu chhuakte chu Ka sawi ka sawi dâwn e.

¹⁴I thu târlante zawm hi ka hlimna a ni a, Sum tam tak neiha ka hlim ang maiin.

¹⁵I thuruatte ka ngaihtuah a, I kawngte chu ka chhui bawk ṭhîn.

¹⁶I thutak chu ka lawmzâwng a ni a, I thute chu ka theihnghilh ngai lo vang.

¹⁷I chhiahhlawh chungah hian ṭha takin ti la, I thu zâwma ka nun theih nân.

¹⁸Ka mit mi tihvârsak ang che, I Dân makzia ka hmuh chian theih nân.

¹⁹Leiah hian khualzin mai ka ni a, I thupêk chu ka lakah hian zêp suh ang che.

²⁰I rorêl hriat châkin Eng lai pawhin ka vân ruai ṭhîn.

²¹Mi chapo, ânchhe dawngte chu i zilhhau va, I thupêk pawisa lotute chu.

²²Hmusit taka min sawichhiatna hi la bo vang che, I thu hriattîr ka zâwm si a.

²³Miliante chuan ṭhu khâwmin min phiar a, Kei, i chhiahhlawh hi chuan i Dânte ka ngaihtuah ṭhîn.

²⁴I thu hriattîr chu ka lâwmzâwng a ni a, Rem min ruatsak ṭhîntu a ni.

²⁵Vaivutah ka tlu reng mai a, I tiam angin min tiharh rawh.

²⁶Ka awm dânte i hnênah ka puang a, nangin min lo chhâng a, I dânte chu min zirtîr ang che.

²⁷I thuruatte chu min hriatthiamtîr la, I thil mak tihte chu ka ngaihtuah ang.

²⁸Lungngaiin ka chau dêr a, I tiam angin min tichak rawh.

²⁹Kawng dik lo chu ka zawh phal suh ang che, Khawngaih takin i dân min zirtîr rawh.

³⁰Kawng dik tak chu ka thlang ta a, I rorêlte ka zâwm bawk ṭhîn.

³¹I thu hriattîrte chu ka zâwm tlat a, Aw LALPA, min timualpho lul suh.

³²I thupêk chu châk takin ka zâwm a, Ka rilru hi a tizau ta.

³³ LALPA, i dân thute min zirtîr rawh, A kip a kawiin ka zâwm dâwn nia.

³⁴I Dân ka zawm theih nân hriatthiamna min pe la, Ka theih tâwkin ka zâwm ang e.

³⁵I thupêkte min zawmtîr la, Chu chu ka lâwmzâwng tak a ni si a.

³⁶I thu hriattîr lamah min hawitîr la, Awhna lamah ni lovin.

³⁷Thil lawilo en lo tûrin ka mit min lâktîr ang che, I kawnga kal tûrin min tiharh rawh.

³⁸I chhiahhlawh hnêna i thutiam chu hlen la, Nangmah ṭihtute hnêna i tiam chu.

³⁹Ka hlauh êm êm, min sawichhiatna hi la bo vang che, I rorêl chu a va ṭha êm!

⁴⁰I thuruatte chu ka ngaina takzet a ni. I ṭhatnain min tiharh rawh.

⁴¹ LALPA, i ngilneihzia ka chungah a lang, I tiam angin min chhandam rawh.

⁴²Min sawichhetute ka chhân theih nân, I thu ka ring si a.

⁴³Eng lai pawhin thu dik min sawitîr rawh, I rorêl chu ka innghahna a ni si a.

⁴⁴I Dânte chu ka zâwm fo vang, Chatuan chatuanin.

⁴⁵Engthâwl takin ka lêng teh ang, I thuruat chu ka zawn ber a ni si.

⁴⁶Lalho hmaah i thu hriattîrte chu ka hril ang a, Ka zak lo vang.

⁴⁷I thupêkte zawm nuam ka ti a, Ka châkzâwng tak a nih avângin.

⁴⁸I thupêkte ka ngainain ka ngaisâng a, I dânte chu ka ngaihtuah ang.

⁴⁹I chhiahhlawh hnêna i thutiam hre reng ang che, Chu chuan beiseina min neihtîr a ni.

⁵⁰Chu chu ka tuar laia min thlamuantu a ni, I thu chuan min tiharh ṭhîn.

⁵¹Chapote chuan min hmusit êm êm a, Mahse, i Dân ka pên bosan ngai lo.

⁵² LALPA, hmasânga i rorêl chu ka hre reng a, Min tithlamuang a ni.

⁵³Mi sualten i Dân an pawisa lo tih ka hmuhin, Ka thin a ur êm êm a ni.

⁵⁴Ka dam chhûng rei lo tê-ah hian I dânte chu zaiin ka chawi ang.

⁵⁵ LALPA, zânah i hming ka hre reng a, I Dânte chu ka ngaihtuah ṭhîn.

⁵⁶I dân zawm hi, Ka lâwmna chu a ni.

⁵⁷ LALPA, ka chanvo i ni a, I thu zawm ka tiam ta e.

⁵⁸Theihtâwpin i duhsakna ka zawng a, I tiam angin min khawngaih rawh.

⁵⁹Ka awm dânte ka ngaihtuah a, I thu hriattîrte zâwm tûrin ka ke ka pên ta e.

⁶⁰I thupêkte chu muangchâng lovin Ka zâwm ta vat a ni.

⁶¹Mi sual rualin min hual vêl a, Mahse, i Dânte chu ka theihnghilh lo.

⁶²Zânlaiah te fak tûr chein ka tho ṭhîn a, I rorêlte a dik avângin.

⁶³Nangmah ṭihtute zawng zawng ṭhian ka ni, I dân zâwmtute chu.

⁶⁴ LALPA, lei hi i ngilneihnain a khat a, I dânte chu min zirtîr rawh.

⁶⁵I chhiahhlawh chungah hian, LALPA, I thu angin thil ṭha i ti ṭhîn a.

⁶⁶Finna leh hriatna ṭha min zirtîr rawh, I thupêk hi ka ring si a.

⁶⁷Ka tuar hma khân ka vâk bo ṭhîn, Mahse, tûnah i thu ka zawm tâk hi.

⁶⁸Nang zawng i ṭha a, thil ṭha titu i ni, I dânte chu min zirtîr rawh.

⁶⁹Chapote chuan min hêk ṭhîn a, Kei chuan theihtâwp chhuahin i dân ka zâwm a ni.

⁷⁰An thinlung a sak a, Kei zawng i Dân ka lâwmna a ni ṭhîn.

⁷¹Min tuartîr kha ka tân a lo ṭha e, I dânte chu ka zir phah ta.

⁷²I Dân min pêkte hi, Tangka leh rangkachak sâng tam tak aiin a hlu zâwk a ni.

⁷³I kutin min siam a, min din nghet a, Hriatthiamna min pe la, i thupêkte ka zir ang e.

⁷⁴Nangmah ṭihtuten min hmu ang a, an lâwm ang, I thu ka rin tlat avângin.

⁷⁵ LALPA, i rorêl chu a dik tih ka hria, Dik takin min zirtîr ṭhîn a lo ni e.

⁷⁶I chhiahhlawh hnêna i tiam ang khân, Aw, i ngilneihna chuan min tithlamuang teh se:

⁷⁷Min khawngaih la; tichuan, ka nung ang a, I Dân hi ka lâwm si a.

⁷⁸Chapote chu mualpho rawh se, dâwta min hêk avângin, Kei chuan i thuruatte ka ngaihtuah ang.

⁷⁹Nangmah ṭihtute chu ka lam lo hawi rawh se, I thu hriattîr hretute chu.

⁸⁰I dânte chu zâwm vek ila, Ka mualpho ngai lo vang.

⁸¹Min chhanchhuahna nghâkin ka chau ta e, I thu ka ring si a.

⁸²I thutiam thlîr nân ka mit a vai zo va, ‘Engtikah nge min thlamuan ang?’ tiin.

⁸³Ip hluihlâwn ung tawh ang ka ni; Mahse, i dânte chu ka theihnghilh lo.

⁸⁴I chhiahhlawh hi eng chen nge ka la dam ang? Engtikah nge min tiduhdahtute chungah ro i rêl dâwn?

⁸⁵Mi chapo, i Dân zâwm duh lote chuan, Ka tlâk nân khur an lai a.

⁸⁶I thupêkte a rin tlâk êm êm a, Dâwtin min bei a ni - min ṭanpui rawh.

⁸⁷Lei ata hi min tiboral ṭhelh ṭhelh a ni; Mahse, i thuruatte chu ka thlahthlam chuang lo ve.

⁸⁸Ngil i neih êm avângin min tiharh la, I thu hriattîr ka zâwm dâwn nia.

⁸⁹Aw LALPA, vânahte khian I thu chu a awm kumkhua ang.

⁹⁰I rinawmna chu chhuan zawng zawng thlengin a pangngai reng a, Lei i din nghet a, a awm ta reng a ni.

⁹¹I rorêl angin tûn thleng hian engkim an awm a, An za vaiin i chhiahhlawh vek an ni.

⁹²I Dân hi ka lâwmzâwng tak ni suh sela chuan, Hrehawm tuarin ka boral daih tawh ang.

⁹³I thuruatte ka theihnghilh ngai lo va, Nangin chûng chuan min tiharh ṭhîn.

⁹⁴I ta ka ni, min chhandam rawh, I thuruat zawngtu ka ni si a.

⁹⁵Mi sualte chuan min thah tumin min châng mah se, I thu hriattîrte chu ka ngaihtuah ang.

⁹⁶Engkim mai hian tâwp chin a nei tih ka hre ta a, I thupêk erawh chu zau tak a ni.

⁹⁷Aw, I dân chu ka va ngaina êm, Ni tin ka ngaihtuah ṭhîn a ni.

⁹⁸I thupêk chuan ka hmêlmate aiin mi tifing a, Kumkhuaa min chênchilh reng avângin.

⁹⁹Min zirtîrtu zawng zawng aiin ka fing zâwk e, I thu hriattîr ka ngaihtuah fo avângin.

¹⁰⁰Tarte aiin ka hre zau va, I thuruatte ka vawn ṭhin avângin.

¹⁰¹Kawng sual rêng rêng ka dai ngai lo, I thu ka zawm theih nân.

¹⁰²I rorêl chu ka pênsan ngai lo va, Nangmah ngeiin min zirtîr avângin.

¹⁰³I thute chu ka kâah hian a va tui êm! Khawizu aiin a thlum zâwk e.

¹⁰⁴I thuruat chuan min tifing a, Awm dân dik lo tinrêng ka hua a ni.

¹⁰⁵I thu hi ka ke atân khâwnvâr a ni a, Ka kawng atân êng a ni bawk.

¹⁰⁶I rorêl dik tak chu Zawm ka tiam a, ka nemnghet e.

¹⁰⁷Ka tuar nasa êm mai, LALPA, I thu angin min tiharh rawh.

¹⁰⁸ LALPA, khawngaih takin ka fakna hi lo lâwm la, I rorêl chu min zirtîr rawh.

¹⁰⁹Ka nunna hi i kuta awm a ni a, I Dân ka theihnghilh ngai lo ve.

¹¹⁰Mi sualte chuan ka awh nân thang an kam a; Mahse, i thuruat chu ka pênsan lo.

¹¹¹I thu hriattîrte chu ka kumkhaw rochan a ni a, Ka thinlung pawh a tihlim êm êm ṭhîn.

¹¹²Kumkhuaa i dân zâwm tûrin Ka rilru ka siam fel ta.

¹¹³Mumal nei lote chu ka hua a, I Dânte erawh chu ka ngaina e.

¹¹⁴Nang chu ka bihrûkna, ka phaw i ni, I thu ka ring tlat e.

¹¹⁵Thil sual titute u, min kalsan rawh u; Pathian thupêk ka zâwm dâwn a ni.

¹¹⁶I tiam angin min dawm ding la, ka nung dâwn nia, Ka beisei hi tithlâwn lul suh ang che.

¹¹⁷Mi chelh tlat la, ka him ngei ang, I dânte chu ka zâwm fo vang.

¹¹⁸I dân pênsantute chu i duh lo va, Mi bum an tumna chu engmahlo mai a ni.

¹¹⁹Leia mi sualte chu a êkchhia ang maiin i hnâwl zêl a, Chuvângin, i thu hriattîr ka ngaina ta a ni.

¹²⁰Ka hlauh che avângin ka tisa a khûr a, I rorêlte hlauvin ka khat.

¹²¹Dik tak leh fel takin thil ka ti ṭhîn, Min tiduhdahtute kutah min pe lul suh.

¹²²I chhiahhlawh hi ṭanpui tiam la, Mi chapoten min nêkchêp hi phal suh.

¹²³I chhandamna thlîr nân ka mit a vai zo va, Chhandam i tiam kha hmuh tumin.

¹²⁴I chhiahhlawh chungah hian ngilnei takin ti la, I dânte chu min zirtîr bawk ang che.

¹²⁵I chhiahhlawh ka ni a, hriatthiam theihna min pe ang che, I thu hriattîrte chu ka hriat theih nân.

¹²⁶ LALPA, i chêt a hun ta e, I Dân an bawhchhiat hi.

¹²⁷Chuvângin, i thupêkte chu rangkachak aiin ka ngaina a, A ni, rangkachak thianghlim ber ai pawhin.

¹²⁸Tichuan, i thuruat zawng zawngte chu a zavaiin ka zâwm a, Awm dân dik lo tinrêng ka hua a ni.

¹²⁹I thu hriattîrte chu a va mak êm! Chuvâng chuan, ka zâwm ṭhîn.

¹³⁰I thu hrilhfiahna chuan mite a tiêng a, Mi mâwlte pawh a tifing ṭhîn.

¹³¹I thupêkte hriat châk takin, Ka âng meuhvin ka thaw huam huam a ni.

¹³²Ka lamah lo hawi la, min khawngaih rawh, I hming ngainatute chunga i tih fo ṭhin ang khân.

¹³³I tiam angin ka ke pênte hi tinghet ang che, Sualin ka chunga thu a neih phal suh ang che.

¹³⁴Min nêkchêptute kut ata hi min chhan chhuak la, I thuruatte ka zâwm dâwn nia.

¹³⁵I chhiahhlawh chungah hian i hmêl lo êng sela, I dânte chu min zirtîr bawk ang che.

¹³⁶I dânte chu an zawm duh loh avângin, Lui tui angin ka mittui hi a luang fo ṭhîn.

¹³⁷ LALPA, nang chu mi dik i ni a, I rorêl pawh a dik a ni.

¹³⁸I thu hriattîrte chu a dik a, A rin tlâk êm êm bawk.

¹³⁹Ka ṭhahnemngaihna chuan mi ei zo va, Ka hmêlmaten i thu an theihnghilh tâk avângin.

¹⁴⁰I thute chu finfiah vek tawh a ni, I chhiahhlawh hian a ngaina êm êm e.

¹⁴¹Eng mah tham lo, hmuhsitawm tak ka ni; Mahse, i thuruatte ka theihnghilh ngai si lo.

¹⁴²I dikna hi a awm kumkhua ang a, I Dân pawh hi a ṭha reng ang.

¹⁴³Manganna leh buainain min rawn nang a; Mahse, i thupêk hian min tilâwm ṭhîn.

¹⁴⁴I thu hriattîrte chu a dik kumkhua dâwn a, Hriatthiamna min pe la, ka nung dâwn nia.

¹⁴⁵Theihtâwp chhuahin ka au che a, LALPA, min chhâng ang che, I dânte chu ka zâwm dâwn nia.

¹⁴⁶Ka koh che hi, min chhandam rawh, I thu hriattîrte chu ka awih dâwn nia.

¹⁴⁷Khawvâr hmain ṭanpui dîlin ka au ṭhîn che, I thu ka beisei ṭhîn a ni.

¹⁴⁸Ka meng tlaivâr ṭhîn e, I thu ngaihtuahin.

¹⁴⁹I ngilneihna avângin ka aw lo ngaithla la, LALPA, i tih fo ṭhin ang khân min khawngaih rawh.

¹⁵⁰Thil sual tih chîngte chuan min rawn hnaih hi, I thu zâwm duh ngai lote chuan.

¹⁵¹ LALPA, nang ka kiangah i awm a, I thupêk zawng zawngte a rin tlâk si.

¹⁵²I thu hriattîrte chu kumkhua atân i tinghet tih Hmân aṭangin ka lo hre tawh a ni.

¹⁵³Ka tuarna hi en la, min chhan chhuak teh, I Dân ka theihnghilh ngai si lo.

¹⁵⁴Mi sawipui la, min tlan ang che, I tiam angin min tiharh rawh.

¹⁵⁵Mi sualte tân chhandamna chu hla tak a ni, I dânte chu an zir duh si lo va.

¹⁵⁶ LALPA, ngil i nei êm êm a, I tih fo ṭhin angin min tiharh rawh.

¹⁵⁷Hmêlma, min ûmtute an tam hle a; Mahse, i thu hriattîr ka pênsan ngai lo ve.

¹⁵⁸Phattute ka hmuhin ka ten êm êm, I thu an awih duh loh avângin.

¹⁵⁹I thuruatte ka ngaihnatzia hi, min han en teh, LALPA, i ngilneihna avângin min tiharh rawh.

¹⁶⁰I thu laipui chu thutak hi a ni, I rorêl zawng zawng chu a dik kumkhua a ni.

¹⁶¹Hotute chuan chhan awm lovin min tiduhdah a, Mahse, i thu ka ngaisâng e.

¹⁶²I thu vângin ka hlim êm êm ṭhîn a, Sum tam tak chhartu ang maiin.

¹⁶³Dâwt ka hua a, ka ten a ni, I Dân erawh hi chu ka ngaina e.

¹⁶⁴Ni khatah vawi sarih ka fak ṭhîn che, I rorêl chu a dik êm avângin.

¹⁶⁵I Dân ngaihtuahtute an thlamuang êm êm ṭhîn, Eng mahin a titlu thei si lo.

¹⁶⁶ LALPA, i chhandamna ka nghâk reng a, I Dânte chu ka zâwm zêl a.

¹⁶⁷I thu hriattîrte chu ka zâwm ziah a, Ka ngaina êm êm ṭhîn.

¹⁶⁸I thuruat leh i thu hriattîrte chu ka zâwm zêl ṭhîn, Ka awm dân zawng zawngte i hre vek bawk.

¹⁶⁹ LALPA, ka au aw hi i hnên lo thleng sela, I tiam angin hriatthiamna min pe ang che.

¹⁷⁰Khawngaih ka dîlna hi i hnên lo thleng sela, I tiam angin min chhandam rawh.

¹⁷¹Nangmah fakin ka zai ang a, I dânte chu min zirtîr ta si a.

¹⁷²Ka lei hi i thu fakin zai rawh se, I thupêk zawng zawng chu a dik a ni.

¹⁷³Min ṭanpui tûrin inpeih reng la, I thuruatte ka thlang ta si.

¹⁷⁴Aw LALPA, i chhandamna ka nghâkhlel a, I dânte chu ka lâwmzâwng tak a ni.

¹⁷⁵Min tinung la, ka fak ang che, I rorêl chuan min pui rawh se.

¹⁷⁶Berâm angin ka vâk bo va, i chhiahhlawh hi min rawn zawng teh, I thupêkte ka theihnghilh ngai si lo.