Read Mizo Lushai Sam 12 Bible Online

Sam 12 - Mizo Lushai bible

Sam 12

¹ LALPA, min ṭanpui rawh, Pathian ngaihsak mite chu an bo zo va, Mihring zîngah mi rinawmte an ral ta.

²Mahni ṭhiante dâwt inhrilh tawnin, Ṭawng thlum takin an inbum ṭhîn.

³ LALPAN bum hmangte hmui chu hlep sela, Chapo taka ṭawngna leite nên chuan.

⁴“Ṭawnghmang thiamah kan hneh a, Kan duh apiang kan sawi ang a, Tu nge kan chungah hian lêng ang?” an ti.

⁵“Retheite hnehchhiahna avâng leh Pachhiate rûm thâwm avângin Ka tho vang a, an nghahhlelh ang ngeiin Tûnah ka chhan chhuak dâwn,” LALPAN a ti.

⁶ LALPA thu tiamte chu a thianghlim a, Tangkarua rawh thianghlimna khura meipuia rawh thianghlim, Vawi sarih rawh thianghlim tawh hnu ang hi a ni.

⁷ LALPA, nang chuan min vêng ṭhîn a, Tûnlai mite lakah hian min hum kumkhua ang che.

⁸Mi suaksualte chu kil tinah an vei a, Mihring zîngah pâwngnêk an uar tâk hi.