Read Mizo Lushai Sam 132 Bible Online

Sam 132 - Mizo Lushai bible

Sam 132

¹ LALPA, Davida hi a hrehawm tuarna zawng zawng Hriatpui ang che.

² LALPA hnênah thu a tiam a, Jakoba Mi Chaka hnêna a intiamkam kha Hriatpui ang che.

³‘Ka in chhûngah ka lût lo vang a, Ka khumah pawh ka kai hek lo vang;

⁴Ka muhîl lo vang a, Ka maimitchhîng hek lo vang,

⁵ LALPA tân hmun ka hmuh hma leh, Jakoba Mi Chaka chênna tûr hmun ka neih hma chu,’ A tih kha.

⁶Ngai teh u, Efrata-ah a awm tih kan hria a, Jaar phûlah kan va hmu ta.

⁷A awmnaah kal ila, A ke bulah i kûn ang u.

⁸ LALPA, tho la, i chawlhna tûr hmunah kal rawh. I chakzia lanna Bâwm nên chuan.

⁹I puithiamte chu diknain inthuam se, Nangmah ngaihsaktute chu lâwmin au chiam rawh se.

¹⁰I chhiahhlawh Davida hnênah thu i tiam tawh si a, I hriakthiha hi tilunghnûr suh ang che.

¹¹ LALPAN Davida hnênah thu a tiam tlat tawh chu, A rinawm a, a sût lo vang.

¹²‘I fate chuan ka thuthlung an pawma, Ka thu zirtîrte an zawm bawk chuan, An fate pawh i lalṭhutthlêngah chuan An ṭhu zêl ang,’ a tih kha.

¹³ LALPAN Zion tlâng hi a thlang ta a, A chênna hmun atân a duh a ni.

¹⁴‘Hei hi ka kumkhaw chawlhna tûr a ni, Ka awm reng nân ka duhzâwng tak a ni.

¹⁵Ei leh bâr kawngah mal ka sâwm ngei ang che a, A mi, retheite pawh ka hrai tlai ang.

¹⁶A puithiamte chhandamnain ka thuam ang a, A mi thianghlimte pawh hlim takin an au vang.

¹⁷Tah chuan, Davida thlah lal ropui tak ka ṭhuttîr ang, Ka hriakthiha tân chuan khâwnvâr ka chhi ta e.

¹⁸A hmêlmate ka timualpho vang a, A lallukhum ka tihtlêtsak bawk ang.’