Read Mizo Lushai Sam 135 Bible Online

Sam 135 - Mizo Lushai bible

Sam 135

¹ LALPA chu fak rawh u; LALPA hming chu fak ula, LALPA chhiahhlawhte u, fak rawh u.

² LALPA ina rawngbâwla, Kan Pathian in hung chhûnga che ṭhînte u, LALPA chu fak rawh u.

³ LALPA chu fak rawh u, ani chu a ṭha si a. A hming fakin zai rawh u, a nuam si a.

⁴ LALPAN Jakoba chu a thlang ta a, Israela chu a ta bîk atân a nei ta e.

⁵ LALPA ropuizia hi ka hre ta e, Kan LALPA hi Pathian dang zawng zawng aia ropui zâwk a ni.

⁶Lei leh vânah te, tuipuiah leh tuifinriatah te, LALPAN a duh apiang a ti ṭhîn.

⁷Kâwlkil aṭangin chhûm a chhohtîr a, Ruah sûr nân kâwl a phêttîr a, A bâwm ata thli a rawn chhuah.

⁸Aigupta rama mihringte leh rante chu, An fa tîr a tihhlumsak a.

⁹Aigupta ramah, Farawa leh a chhiahhlawhte hrem nân, Chhinchhiahna leh thil mak tak tak a tih kha.

¹⁰Ani chuan hnam tam tak a tichhia a, Lal ropui tak takte a that bawk.

¹¹Amor lal Sihona te, Basan lal Oga te, Kanan ram lal zawng zawngte nên.

¹²An ramte chu a mite a pe a, A ni, Israel-te rochan atân a pe.

¹³ LALPA, i hming chu kumkhuain a dai lo vang, Chhuan zawng zawngin, LALPA, an hria ang che.

¹⁴ LALPA chuan a mite chu thiam a chantîr a, A chhiahhlawhte chungah khawngaihna a lantîr ta,

¹⁵Hnam dangte pathian chu mihring kutchhuak, Rangkachak leh tangkaruaa siam an ni e.

¹⁶Ka an nei a, an ṭawng thei si lo va, Mit an nei a, an hmu thei bawk si lo.

¹⁷Beng an nei a, eng mah an hre thei lo va. Thâwk pawh an thaw thei hek lo.

¹⁸Chûng ringtu leh siamtu zawng zawngte chu, Chûng milem ang lek chu ni hlawm rawh se.

¹⁹Aw, Israel chhûngte u, LALPA chu fak rawh u, Aw, Arona chhûngte u, LALPA chu fak rawh u,

²⁰Aw, Levia chhûngte u, LALPA chu fak rawh u, LALPA ṭihtute u, LALPA chu fak rawh u.

²¹Zion-ah chuan LALPA chu fak ula, Jerusalem-a chêng LALPA chu fak rawh u.