Read Mizo Lushai Sam 138 Bible Online

Sam 138 - Mizo Lushai bible

Sam 138

¹Ka thinlung zawng zawngin LALPA, lâwmthu ka hrilh a che, Hnam dang pathian hmaah nangmah fakin ka zai ang.

²I Tempul thianghlim lam hawiin chibai ka rawn bûk a che, I ngilneihna leh i rinawmna avângin I hming ka fak a ni. I thu leh i hming chu, I chawisâng ta ber a.

³Ka koh che khân min lo chhâng a, Min tihuaiin min tichak ta.

⁴ LALPA, lei lal zawng zawngte hian an fak a che, I thu an hriat tâk avângin.

⁵ LALPA thil tihte fakin hla sa rawh u, LALPA ropuina hi a nasa êm si a.

⁶ LALPA chu ropui hle mah se, Mi tlâwmte chu a ngaihsak a, Chapote erawh chu hla tak aṭang pawhin a hmu a ni.

⁷Buainaten min chîm vêl mah sela, Ka nun i humhim ṭhîn. Ka hmêlmate thinur lo thawk chu i dang kîr a, I kut ding lamin min chhan ṭhîn.

⁸ LALPA, ngil i nei kumkhua a, LALPA, i kut hnathawh bânsan lo la, Ka tân i thiltih tum hlen zâwk ang che.