Read Mizo Lushai Sam 139 Bible Online

Sam 139 - Mizo Lushai bible

Sam 139

¹ LALPA, nangmah ngeiinngun takin mi en fiah a. Min hre chhuak vek a ni.

²Ka ṭhut leh ka din i hre vek a, Hla tak aṭang pawhin ka ngaihtuahte i hria.

³Ka kalna te, ka chawlhna te i hre chiang a, Ka awm dân zawng zawng hi i hre fai vek a ni.

⁴Ngai teh, LALPA, ka sawi hma pawhin ka sawi tûr zawng zawng chu i hre vek si.

⁵Ka hma hruaiin ka hnu i dâl a, I kutphahin min hûm tlat ṭhîn.

⁶Min hriatzia hi a mak lutuk a, Ka tân hriat phâk rual a ni lo.

⁷I hnên ata khaw nge ka kal anga, I hmuh lohvah khaw nge ka tlân bo vang?

⁸Vânah han lâwn ila, i lo awm a, Seol-ah mutna zu siam ila, i lo awm reng bawk si.

⁹Chhaktiangah khian thlâwk chho ila, Tuifinriat râl daihah pawh zu awm ila,

¹⁰I kut chuan min lo vuan ang a, I kut ding lam chuan min lo chelh dâwn si.

¹¹‘Thimin min khuh tlat se, Ka vêl êng hi zânah chang se,’ ti mah ila,

¹²Thim hi i tân a thim ve si lo, Zân pawh chhûn angin a êng a, Thim leh êng hi i tân thuhmun reng a ni.

¹³A ni, ka taksa pêng tin hi i siam a ni, Ka nu pum chhûngah min rem khâwm a.

¹⁴Aw Chungnungber, ka fak a che, Hlauhawm tak i ni si a, Mak taka siam ka ni; I thiltih hi a mak êm êm a, Ka hre chiang hle a ni.

¹⁵Ka ruhrel hi i lakah thup a ni lo, A rûka siam ka nih lai leh Lei chhûngrila min rem khâwm lai pawh khân.

¹⁶Kutke ka neih hma pawhin mi hmu vek a, Ka dam chhûng ni tûrte a inṭan hma daihin, I lehkhabu-ah chuan ziak vek a ni.

¹⁷Aw Pathian, i mi ngaihtuahnate chu ka tân a va hlu êm! Chhiar sên rual a ni lo.

¹⁸Chhiar dâwn ila, ṭiauvaivut aia tam a ni a, Ka han harh chuan i kiangah ka lo awm reng si.

¹⁹Aw Pathian, mi sualte hi that mai teh, Thisen chhuah mite u, min kalsan daih rawh u.

²⁰Chûng chuan an sawichhe ṭhîn che a, Nangmah dotute chuan an tinawmnah ṭhîn che.

²¹Aw LALPA, nangmah hawtute chu ka va haw êm! I chunga helte chu ka va ten êm!

²²Huat tak têin ka hua a, Ka hmêlmaah te ka chhiar hlawm a.

²³Aw Pathian, mi en fiah la, Ka rilru hi hre tlang ang che. Mi en ngun la, ka ngaihtuahte hi hre vek ang che.

²⁴Keimahah hian dik lohna rêng a awm emaw en la, Chatuan kawngah min hruai ang che.