Read Mizo Lushai Sam 14 Bible Online

Sam 14 - Mizo Lushai bible

Sam 14

¹Mi â chuan “Pathian rêng a awm lo ve,” a ti rilru ṭhîn. Hlemhle takin an che ṭhîn a, thil tenawm tak an ti a, Thil ṭha ti rêng an awm lo.

²Pathian zawnga fing taka thil ti an awm nge awm lo tiin, Vân aṭangin LALPAN mihringte chu a zuk thlîr a;

³Pêng bo, rilru chhe pu an lo ni vek si a, Thil ṭha ti rêng an awm lo va, Pakhat tê mah an awm hauh lo.

⁴Mi hlemhle zawng zawngte hian, ka mite ei tûr chu An eisak ṭhîn a ni tih hi an hre na nge? LALPA hming lah chu an ko si lo.

⁵Mi dikte chu Pathianin a awmpui avângin, Anni chuan an hlau êm êm ang.

⁶Retheite remruat chu an timualpho ṭhîn a, Mahse, anni lo humtu chu LALPA a ni.

⁷Israel-te chhandamna chu Zion ata lo thleng sela, LALPAN a mite a tihhmuingîl hunah chuan Jakoba thlahte chu an va hlimin an va lâwm dâwn tak êm!