Read Mizo Lushai Sam 140 Bible Online

Sam 140 - Mizo Lushai bible

Sam 140

¹ LALPA, mi sual lakah mi chhan chhuak la, Mi nunrâwng lakah mi humhim ang che.

²Thil sual tih an rilrûk reng a, Ni tin buaina an chawk chhuak ṭhîn.

³An lei chu rûl tûr ang hian a hlauhawm a, An thu chu rûlrial tûr ang hi a ni.

⁴ LALPA, mi sual lakah min vêng la, Tihtlûk tuma min bei ṭhîntu Mi nunrâwngte lakah min hum ang che.

⁵Chapote chuan ka awh nân hruihrualin thang an kam a, Ka kalkhânah lên an zâr a, Kawng tluanin thang an kam a ni.

⁶ LALPA hnênah, ‘ka Pathian i ni e, LALPA, khawngaih ka dîlna hi lo ngaithla teh,’ ka ti a.

⁷Aw LALPA, ka LALPA, chhandamtu chak, Indo nia min humhimtu i ni.

⁸ LALPA, mi sualte duhthusâm chu hlawhtlintîr suh la, An thiltum chu puitlin suh se.

⁹Min hualtute lu chungah chuan, Min vauna chu tla zâwk rawh se.

¹⁰An chungah meiling sûr se, Leilâwtah tla sela, Lo chhuak leh tawh suh se.

¹¹Dâwta mi hêk chîngte chu hlawhtling suh se, Nunrâwngte chu thil ṭha lovin nangchîng sela, Nuai nek hlawm rawh se.

¹² LALPA, retheite chu i ṭan ṭhîn tih ka hria, Pachhiate tân dik takin ro i rêl ṭhîn.

¹³Mi dikte chuan i hming an fak ang a, Mi nun ngîlte chu i bulah an chêng reng ang.