Read Mizo Lushai Sam 141 Bible Online

Sam 141 - Mizo Lushai bible

Sam 141

¹ LALPA, ka koh che hi, lohmanhmawh la, Ka auh che hi, i beng lo chhi ang che.

²Ka ṭawngṭaina hi rimtui hâl angin lo chho sela, Ka kut phar hi tlai lam thilhlan angin lo pawm ang che.

³ LALPA, ka kâ vêngtu tûr ruat la, Ka hmui vêng tûr min pe ang che.

⁴Ṭhil ṭha lo tih châkna lakah min vêngin, Mi sualte zînga thil sual ka tih ve phal suh la, Thil sual tih chîngte ruai ṭheh ka kîl ve phal hek suh.

⁵Mi dik chuan min khawngaih avângin Min vua-in, min zilh rawh se, Chu chu hriak ṭha ber a ni, Ka lu hian hnar suh se. Mi sualte thiltih do erawh chuan ka ṭawngṭai reng a ni.

⁶An rorêltute chu khâma nam thlâk an nih hunah, Ka thu chu pawm nuam an ti ang.

⁷Leilettuin lei a tisawm nuai ang hian Ka ruhte pawh thlân kotlângah a darh tâk hi.

⁸Aw LALPA, ka LALPA, kei chuan ka thlîr rêng che a ni, Ka rawn bêl che a, saruakin min kalsan suh.

⁹Thil sual titute thang lakah te, Ka awh nâna lên an zâr lakah te chuan min hum ang che.

¹⁰Mi sualte chu anmahni thang kamah chuan âwk sela, Kei chu him thên ila ka va ti êm!