Read Mizo Lushai Sam 144 Bible Online

Sam 144 - Mizo Lushai bible

Sam 144

¹Ka lungpui, LALPA hi fak rawh u, Râl kah min zirtîr a, Indo dân tûr min thiamtîr bawk a.

²Ka tân kulhpui rinawm, Ka himna tûra kulhbîng sâng a ni. Ka phaw ka inhumhimna chu a ni, Ka mite ka hnuaia kûntîrtu a ni.

³ LALPA, mihringte hi eng nge maw an niha, i hriata, Hringfate hi eng nge maw an niha i ngaihtuah ṭhin?

⁴Thli thaw ang lek an ni a, An dam chhûng nite chu hlim ral mai ṭhîn ang hi a ni.

⁵Aw LALPA, i vânte chu rawn tihniam la, Lo chhuk ta che. Tlângte khawih la, khu luih luih bawk rawh se.

⁶Kâwl phêttîr la, hmêlmate chu darh vek sela, Thalin kâp la, tlânchhe rawh se.

⁷Vân sâng aṭangin i kutin rawn ban la, Tui thûk tak ata min chhan chhuakin, Hnam dang kut ata hi min chhanhim teh.

⁸Chûng mite chuan dâwt an heh a, Dâwtin chhia an chham ṭhîn.

⁹Aw Pathian, i tân hla thar ka sa ang a, Perhkhuang hrui sâwm neiin ka fak ang che.

¹⁰Lalte hnênah hnehna i pe a, I chhiahhlawh Davida chu khandaih hriam lakah I chhanhim ta si a.

¹¹Hnam dang kut ata hi min chhan chhuakin, Min humhim ang che. Chûng mite chuan dâwt an heh a, Dâwtin chhia an chham ṭhîn.

¹²Kan fate chu an vânglai hian, Thing ṭhang duang tak ang hi ni se, Kan fanute pawh chu Lal ina a kil bang cheimawi ang hi lo ni rawh se.

¹³Kan buhzêmte chu thlai tinrêngin khat thûr thûr se, Kan ram chhûnga kan berâm vulh te pawh, A sâng têl te, a sîng têl tein pung bawk rawh se.

¹⁴Kan ran rualte chuan no chhiat lovin hring sup sup sela, Riral bawk hek suh se. Kan kawtthlêrahte pawh mangang au thâwm awm hek suh se.

¹⁵Chutiang taka malsâwmna dawng hnam chu an nihlawh e. Pathian, LALPA neitu hnam chu a nihlawh e.