Read Mizo Lushai Sam 145 Bible Online

Sam 145 - Mizo Lushai bible

Sam 145

¹Aw Lalber, ka Pathian, ka chawimawi ang che a, I hming ka fak kumkhua dâwn e.

²Ni tin ka fak ang che a, I hming ka chawimawi kumkhua ang.

³ LALPA chu a ropui a, chawimawi chiam tûr a ni; A ropuizia chu chhui chhuah rual a ni lo.

⁴I thil tihte chu chhuan zawng zawngin an fak ang a, I hna thawhte an hril zêl ang.

⁵I ropui nasatzia an hril ang a, I thiltih makzia hi ka chhût bawk ang.

⁶Miten i thiltihtheihzia hi nasa takin an sawi ang a, I ropuizia ka hril bawk ang.

⁷I ṭhatzia hi an sawi bawrh bawrh ang a, I dikzia hi hlim takin an aupui ang.

⁸ LALPA chuan lainatna a ngah a, mi a khawngaih ṭhîn, Thinnel tak a ni a, ngil a nei êm êm ṭhîn.

⁹ LALPA chu mi tin chungah a ṭha a, A thil siam zawng zawng chu a lainat ṭhîn.

¹⁰Aw LALPA, i thil siamten an chawimawi chia, Nangmah ngaihsaktute chuan an fak a che.

¹¹I ram ropuizia chu an sawi ang a, I thiltihtheihzia pawh an hril bawk ang.

¹²I thiltih ropuizia mihringte hnêna hriattîr tûr leh I ram mawi ropuizia tilang tûrin.

¹³I ram chu ram hlun tûr a ni a, Kumkhuain thu i nei dawn si. LALPA chu a thutiamah a rinawm a, A thiltih apiangah ngil a nei ṭhîn.

¹⁴ LALPA chuan tlute a tungding a, Lungngaia kûnte pawh a tiharh ṭhîn.

¹⁵Nangmah nghâktute mit chu i chungah a fu a, A hun takah ei tûr i pe ziah ṭhîn.

¹⁶I kut i han phar a, Thil nung tinrêng an chaw duhzâwngin i hrai ṭhîn.

¹⁷ LALPA chu a thil tih zawng zawngah a dik a, A thiltih apiangah ngil a nei ṭhîn.

¹⁸Amah kotute chu LALPAN a hnaih ṭhîn a, Tihtakzeta amah autu zawng zawngte chu.

¹⁹Amah ṭihtute duhzâwng chu a tihsak a, An au thâwm a hria a, a chhanhim ṭhîn.

²⁰ LALPA chuan amah hmangaihtute a vêng ṭhîn a, Mi sualte erawh chu a tiboral ang.

²¹Ka kâ hian LALPA fakna thu a hril ang a, Thilsiam zawng zawngin a hming thianghlim chu Kumkhuain fak rawh se.