Read Mizo Lushai Sam 146 Bible Online

Sam 146 - Mizo Lushai bible

Sam 146

¹ LALPA chu fak rawh u, Aw ka nunna, LALPA chu fak rawh.

²Ka dam chhûngin LALPA ka fak ang a, Ka nun chhûng zawng Pathian fakin ka zai ang.

³Mihring zînga miliante chu ring duh suh u, Tu mah an chhandam thei si lo.

⁴An thi a, leiah an kîr ta a, Chumi ni chuan an thiltum zawng zawng pawh a ral nghâl ṭhîn.

⁵Jakoba Pathian, ṭanpuitua neihte chu an nihlawh e, LALPA Pathiana beiseina nghattute chu.

⁶Ani chuan lei leh vân a siam a, Tuifinriat leh a chhûnga awmte nên; A thutiam pawh a hlen zêl ṭhîn.

⁷Hnehchhiahte chu dik takin ro a rêlsak a, Rilṭâmte chu chaw a pe a, LALPA chuan mi tângte a chhuah bawk ṭhîn.

⁸ LALPAN mitdelte mit a tivâr a, LALPA chuan lungngaia kûnte pawh a tiharh ṭhîn.

⁹ LALPA chuan mi dikte a hmangaih a, LALPA chuan mikhualte pawh a vêng bawk ṭhîn. Fahrahte leh hmeithaite chu a chhawmdâwl ṭhîn a, Mi sualte erawh chu a tiboral ang.

¹⁰ LALPA chu kumkhuain a lal ang a, Aw Zion, i Pathian chu a lal reng ang. LALPA chu fak rawh u.