Read Mizo Lushai Sam 147 Bible Online

Sam 147 - Mizo Lushai bible

Sam 147

¹ LALPA chu fak rawh u, Kan Pathian faka zai hi a ṭha si a; Amah fak hi a nuam a ni.

² LALPA chuan Jerusalem a din leh a, Israel mi, an hnawh darhte chu a hruai khâwm leh ta.

³Lungchhiate chu a thlamuan a, An hliamte pawh a tuamsak bawk.

⁴Arsite khi a chhiar vek a, An hming pawh a sa ṭheuh a ni.

⁵Kan LALPA hi a ropui a, chak tak a ni, A finna pawh sawi sên rual a ni lo.

⁶ LALPA chuan inngaitlâwmte a chawisâng a, Mi sualte erawh chu leiah a paih thlu ṭhîn.

⁷Lâwm hla sa-in LALPA chu fak ula, Ṭingṭang nên kan Pathian fakin zai rawh u.

⁸Vân khi chhûm a hliahtîr a, Leiah ruah a sûrtîr ṭhîn a, Tlângahte chuan hnim a ṭotîr ṭhîn, Mihring ei tûr thlai hringte nên.

⁹Ramsate chu chaw a pe a, Choak no rilṭâmte a châwm bawk ṭhîn.

¹⁰Sakawr chakna a ngaihlu lo va, Mihring chakna pawh a ngaisâng hek lo.

¹¹Amah ṭihtute hi a ni LALPA lâwmzâwngte chu, A ngilneihnaa innghat tlatte chu.

¹²Aw Jerusalem, LALPA-ah hian lâwm la, Aw Zion, i Pathian hi fak rawh.

¹³I kulh kawngkhâr kalhnate chu a tinghet a, I chhûnga awm i fate chu mal a sâwm ta.

¹⁴In ramrite chu a tirâlmuang a, Buh tui chi in duh tâwkin a pe che u.

¹⁵A thupêk chu lei chungah a puang a, A sawi ang chuan tih nghâl a ni.

¹⁶Puan vâr phah ang maiin vûr a tlâktîr a, Meivâp lêng angin a tlâktîr chem chem ṭhîn.

¹⁷Lung tê angin rial a tlâktîr a, A vawhzia chu tu nge tuar zo vang?

¹⁸Thu a pe a, vûr chu a tui ta a, Thli a tlehtîr a, tui chu a luang ta a.

¹⁹Jakoba hnênah thu a puang a, A Dân leh a thurêl chu Israela a hriattîr a;

²⁰Chûng chu hnam dang tân a ti ngai rêng rêng lo va, A thurêlte pawh an hre ve ngai hek lo.