Read Mizo Lushai Sam 148 Bible Online

Sam 148 - Mizo Lushai bible

Sam 148

¹ LALPA chu fak rawh u, Vân aṭangin LALPA chu fak ula, Chung lamahte khian amah chu fak rawh u.

²Vântirhkohte u, amah chu fak ula, A ṭhuihruai zawng zawngte u, amah chu fak rawh u.

³Ni leh thlate u, amah chu fak ula, Arsi êng zawng zawngte u, amah chu fak rawh u.

⁴Vân sângte u, amah chu fak ula, Vân chunga tuite u, amah chu fak rawh u.

⁵Chûngho chuan LALPA hming chu fak rawh se, Ani chuan thu a pe a, siam an lo ni ta si a.

⁶Thu a pêk ang ngeiin An awmna tûr ṭheuhvah an awm ta reng a, Kumkhua pawhin an insawn lo vang.

⁷Tuifinriat leh a chhûnga chêng sa lian hlauhawmte u, Lei aṭang hian LALPA chu fak rawh u.

⁸Mei leh rial te, vûr leh chhûm te, Thlipui na tak, a thu awihtu te leh

⁹Tlâng leh mual te, Thei kûng leh sidar thing zawng zawng te,

¹⁰Ramsa te leh ran zawng zawng te, Rannung te leh chunglêng sava te,

¹¹Lei lal te leh mi tinrêng te, Milian te leh leia rorêltu zawng zawng te,

¹²Nula leh tlangvâl te, Naupang leh tar te nên,

¹³ LALPA hming hi fak ṭheuh rawh se, Hming dang zawng aiin a hming chu a ropui zâwk a, A ropuina chu lei leh vân aiin a sâng zâwk daih a ni.

¹⁴A mite chu thiltihtheihnain a thuam a, A ni, amah ngaihsaktute chu chawimawina a khumtîr a, A duh tak Israel mite chu. LALPA chu fak rawh u.