Read Mizo Lushai Sam 17 Bible Online

Sam 17 - Mizo Lushai bible

Sam 17

¹Aw LALPA, ka dikzia hi hria la, Ka au thâwm hi lo ngaithla teh. Dâwt sawi ngai lo dîlna hi ngaihven ang che.

²I hmaah chuan ka thiamna hi târlan ni se, I mit chuan thil dik chu hmu ngei rawh se.

³Ka thinlung hi fiah la, Zânah mi rawn tlawhin mi fiah ang che.

⁴I hnathawh an sawisêl angin ka sawisêl ve lo va, I thu ka zâwm zâwk a, inpâwngnêk ka chîng ngai lo.

⁵I kawng sialah zêl ka kal a, Ka tlu ngai lo.

⁶Aw Pathian, ka koh chein mi chhâng la, I beng dawhin ka thu hi ngaithla ang che.

⁷I ngilneihna mak chu han tilang la, Aw, nangmah bêltute lo hum ṭhîntu, I ding lamin an hmêlmate lakah chhan ang che.

⁸I mitnaute angin min vêng tlat la, I thla hnuaiah min thukru ang che.

⁹Mi suaksualten min hnehchhiah a, min thah tumtu hmêlmaten Min hual si a.

¹⁰Khawngaihna rêng an nei lo va, Chapo takin an ṭawng ṭhîn.

¹¹Kan kalna lam apiangah min hual ṭhîn a, Kan tlûkna tûr remchâng an melh reng a.

¹²Min pawh sawm vek châkin hmun fianrialah Sakeibaknei angin min châng ru ṭhîn.

¹³ LALPA, tho la, anmahni hmachhawnin titlâwm la, Mi sual lakah i khandaih chuan min chhandam ang che.

¹⁴Khawvêl mite lakah min chhandam la, An duh tâwk tâwk nei ṭhînte lakah chuan. Hremna i khâwlsak chuan hrem la, An fate pawh hrem la, An tuchhuan thlengin hrem zêl ang che.

¹⁵Kei zawng mi dik ka nih vângin I hmêl ka hmu ang a, Nangmah anna neia ka ṭhanharh hunah chuan, Ka lungawi takzet ang.