Read Mizo Lushai Sam 18 Bible Online

Sam 18 - Mizo Lushai bible

Sam 18

¹Aw LALPA, mi tichaktu, Ka hmangaih che.

² LALPA chu ka lungpui leh ka kulhpui, Min chhandamtu a ni. Ka Pathian, ka himna lungpui, Min chhandamtu ropui, ka phaw leh kulhbîng sâng a ni.

³Fak tlâk LALPA chu ka ko va, Hmêlma lakah min hum ta a.

⁴Thihna hlauhawm tak chuan min hual vêl a, Chhiatna tuiliante chuan min chîm bawk a.

⁵Seol hruihrualte chuan min phuar vêl a, Thihna thangah ka âwk ṭêp tawh a.

⁶Ka mangang chuan LALPA ka han au va, Pathian hnênah ṭanpuina ka dîl a, A tempul aṭang chuan ka aw a lo hria a, Ka au thâwm chuan a beng a thleng ta e.

⁷Tichuan, lei chu khûrin a insâwi hlawk hlawk a, Tlâng chu a nghahchhante lamin a nghîng ta dur dur a, A thinur nasa tak avâng chuan.

⁸A hnâr aṭangte chuan meikhu a lo chhuak a, A ka aṭang pawh chuan kan ral hmang mei a alh chhuak a, Meilingte pawh a lo chhuak bawk a.

⁹Vân khi a hai hawng a, Chhûm dum chunga dingin a lo chhuk a,

¹⁰Cherub chunga chuangin a thlâwk vêl a, Thlain a thlâwk ta thuak thuak a.

¹¹Thimin a inkhuh a, Ruah pai chhûm chhah tak chuan a hual vêl bawk a.

¹²A hmaa êng awm chuan chhûm chu a chhun tlang a, Ṭêk te, rial te a tla ta dur dur a.

¹³Vânah LALPAN khawpui a tiri a, Chungnungberan a aw a chhuah a ni, Ṭêk te, rial te a tla ta dur dur a.

¹⁴A thal a han kâp a, an darh ta a, Kâwl a phêttîr zawr zawr a, an tlânchhe ta.

¹⁵ LALPA, i hnâra thaw chhuak meuhva i chhêma, I han hau zet chuan, Tuifinriat chu a mawng thlengin a kang zo va, Lei innghahnate pawh a lang zo ta.

¹⁶Vân aṭangin a han ban a, min rawn vuan a, Tui thûk ata min hnûk chhuak ta.

¹⁷Hmêlma chak tak kut ata chu min chhan chhuak a, Ka hneh rual loh min hawtute lak ata chu.

¹⁸Chhiatna ka tawh laiin mi rawn bei a, Mahse, ka nghenchhan chu LALPA a ni.

¹⁹Hmun thâwl takah min hruai chhuak a, Ka chungah hian a lâwm avângin min chhandam ta.

²⁰ LALPA chuan dik taka ka tih avângin lâwmman min pe a, Pawi ka khawih loh avângin mal min sâwm ṭhîn.

²¹ LALPA kawng chu ka zawh ṭhîn a, Pathian lakah thil sual ka ti hek lo.

²²A rêl apiang ka zâwm zêl a, A thupêkte ka bawhchhe ngai lo.

²³A tân mi ngîl tak nih ka tum fo ṭhîn a, Thil sual ti lo tûrin ka invêng reng bawk a.

²⁴Dik taka ka tih ṭhin avângin LALPAN lâwmman min pe a, Pawi ka khawih lo tih a hria.

²⁵I laka rinawmte tân i rinawm a, Mi ṭhate tân i ṭha êm êm.

²⁶Mi thianghlimte tân chuan i thianghlim a, Mi suaksualte erawh chu i haw ṭhîn.

²⁷Mi tlâwmte chu i chhan ṭhîn a, Chapote erawh chu i titlâwm ṭhîn.

²⁸Ka khâwnvâr chu mi hâlsak a, LALPA ka Pathian chuan ka thimna chu min tihênsak ta.

²⁹Nangma zârah hmêlmate ka ûm a, Ka Pathian zârah chuan an kulh ka lâksak ta.

³⁰Pathian hi zawng a kawngte a tluang a, LALPA thu chuan fiah a dâwl ṭhîn a, Amah bêltu zawng zawngte tân phaw a ni.

³¹ LALPA lo hi tu nge Pathian dang awm? Kan Pathian chauh lo chu tu nge belh tûr dang awm?

³²Chaknaa min thuama, Ka kawng titluangtu chu Pathian a ni.

³³Ka ke te pawh sazuk ke ang maiin min siamsak a, Tlângah himin min dintîr a.

³⁴Ka kutte chu indo a thiamtîr a, Dâr thalngulte ka kuai kûl thei hial a ni.

³⁵Inhumhim nân phaw min pe a, I kut ding lam ngei chuan min kai ta a, Min puihna chuan min tiropui ta bawk.

³⁶Ka pênte chu i tisau va, Ka kête lah a tleu si lo.

³⁷Hmêlmate chu ka han ûm a, ka ûm phâk a, An thih vek hma loh chu ka kîrsan duh lo.

³⁸Ka sât thlu a, an tho thei tawh lo, Ka ke hnuaiah an thal phung mai.

³⁹Indo nikhua atân chaknain min thuam a, Min dotute min hnehtîr ṭhîn.

⁴⁰Ka hmêlmate mi ûmtîr a, Min hawtute ka that zo ta.

⁴¹An au chûl a, chhantu an nei si lo, LALPA chu an au va, a chhâng si lo.

⁴²Ka râwt sawm a, thli len vaivut ang mai hi an ni, Kawtthlêr diak angin ka thian fai ta.

⁴³Hel hmangte lakah chuan min chhan chhuak a, Hnamte hotu-ah min siam a, Ka hriat ngai loh hnamten ka rawng an bâwl ta.

⁴⁴An hriat veleh ka thu an awih zêl a, Ka hmaah an kûn ta.

⁴⁵Hnam dangte chu an zâm zo va, An kulh ata khûrin an lo chhuak ta.

⁴⁶ LALPA hi zawng Pathian nung a ni, Ka lungpui chu fak rawh u, Min chhandamtu Pathian chu ropui rawh se.

⁴⁷Pathianin phuba min lâksak a, Mite ka hnuaiah hian a dah.

⁴⁸Hmêlma lakah min chhanhim a, hnuaichhiahtute chungah min awmtîr a, Mi nunrâwngte lakah min chhan chhuak ta.

⁴⁹ LALPA, hnam tin zîngah ka fak ang che, I hming fakin ka zai bawk ang.

⁵⁰A Lal thlan chu hnehna ropui tak a pe ṭhîn a, A hriakthiha chu a khawngaihin, Davida leh a thlahte chu a lainat kumkhua ang.