Read Mizo Lushai Sam 21 Bible Online

Sam 21 - Mizo Lushai bible

Sam 21

¹ LALPA, i chaknaah lal chu a hlim êm êm a, I hnehtîr avângin a va lâwm êm!

²A duhzâwng chu i pe zêl a, A ngen apiang i hnial ngai lo.

³Thil ṭha tinrêngin i hmuak a, Rangkachak thianghlima siam lallukhum chu i khumtîr a.

⁴Nunna a dîl che a, i lo pe a, Kumkhuaa damna chu i pe ta a.

⁵I chhandam avângin a ropui ta êm êm a, Chawimawina leh zahawmna chu i khumtîr ta.

⁶Mal i sâwm kumkhua a, I hmêlin i tilâwm ṭhîn.

⁷Lal hian LALPA chu a ring tlat a, Chungnungbera ngilneihna avângin a nghîng lo vang.

⁸I kut chuan i hmêlmate i dap chhuak a, I ding lam chuan nangmah hawtute chu i kawi chhuak ta.

⁹I lo lan hunah i thinurna meipuiah i paih ang a, LALPA, i thinurnain a ei zo vang a, Mei chuan a kâng ral ang.

¹⁰An thlahte chu lei aṭangin an chimit ang a, An tuchhuante pawh mihring zîngah an ral vek ang.

¹¹I lakah chuan thil sual tih an tum a, An thil phiarrûk chu a hlawhtling lo vang.

¹²I thal chuan an hmai i tin ang a, Tukkhum chhawnin an tlânchhiatsan ang che.

¹³ LALPA, i chakna avângin chawimawiin awm la, I thiltihtheihzia hi fakin kan zai ang.