Read Mizo Lushai Sam 22 Bible Online

Sam 22 - Mizo Lushai bible

Sam 22

¹Ka Pathian, ka Pathian, engah nge mi kalsan? Engati nge ṭanpuina dîla ka rûm laia hla taka i awm le?

²Ka Pathian chu chhûnahte ka au va, mi chhâng lo va, Zân a lo ni, ka ngawi thei chuang si lo.

³Nang zawng i thianghlim a, lalṭhutthlênga ṭhu, Israel-ten an fak ṭhîna chu i ni.

⁴Kan pi puten an ring che a, An rin vângin i chhan chhuak a.

⁵An au che a, i hum ṭhîn a, Nangmahah chuan an innghat a, nangin i lo chhanhim ṭhîn.

⁶Kei zawng changpât ang lek, mihring tling lo ka ni a, Mî chhawnchhaih leh hmuhsit ka ni.

⁷Min hmu apiangte chuan min nuihzat a, An lu thingin min chhiatkhum a.

⁸“LALPA hnênah a tlulût alâwm, rawn chhan ang hmiang: A mi duhzâwng a ni a, rawn chhan chhuak rawh se!” an ti.

⁹Chhûl aṭanga mi la chhuaktu, Ka nu hnute ringa mi awmtleitu i ni a.

¹⁰Ka pian ata nangmah chauhva innghat ka ni a, Ka nu pum chhûng aṭang tawhin ka Pathian i ni.

¹¹Hmêlma an lo hnai e, min hlat lul suh, Ṭanpuitu dang rêng rêng an awm si lo.

¹²Bâwng kawlhte chuan min hual tuau va, Basan bâwng huaite chuan min hual vêl e.

¹³Sakeibaknei koham rûm angin An kâ min ânkhum a.

¹⁴Tui leih buak ang ka ni, Ka ruhte pawh a pelh zo ta. Ka thinlung chu khawihnûn tui ang a ni.

¹⁵Ka tha lah chu hlumbêl keh them angin a ro zo va, Ka dangah hian ka lei a bet: Thi ang dêrin vaivutah chuan min mut a.

¹⁶Ui angin min hual vêl a, Mi sual rualin min zîm a, Ka kutah leh ka ke-ah an chhun a.

¹⁷Ka ruhte chu ka chhiar thei e. Anni lah chuan min en mai a, min thlîr reng mai.

¹⁸Ka silhfênte an insem a, Ka kawr atân ṭhum an vâwr bawk.

¹⁹ LALPA, nang chuan min hlat lul suh, Aw, min ṭanpuitu, lo hmanhmawh teh.

²⁰Khandaih lakah min rawn chhan la, Hêng ui lakahte hian ka nunna chhanhim rawh.

²¹Sakeibaknei kâ ata hi min chhandam la, Ramsial ki kâr ata min la chhuak ang che.

²²Tichuan, ka unaute hnênah i hming ka hril ang a, Pung khâwm zîngah chuan ka fak ang che.

²³ LALPA ṭihtute u, amah chu fak rawh u, Jakoba thlahte u, chawimawi ula, Israela fate u, a hmaah kûn rawh u.

²⁴Retheite chu a hmusit ngai lo va, a ten hek lo. Ṭanpui an dîlin a lo hria a, a hawisan ngai hek lo.

²⁵Pung khâwm ropui tak zîngah ka fak ang chia, Nangmah ṭihtute hmaah chuan Ka thutiamte ka hlen bawk ang.

²⁶Retheite chuan tlai takin ei sela, LALPA zawngtute chuan amah chu fak rawh se. An thinlung chu tihharh ni kumkhua bawk rawh se.

²⁷Lei pum puiin LALPA an hria ang a, a hnênah chi tin an kîr ang a. A hmaah chuan hnam tin an ṭhingṭhi ang.

²⁸ LALPA chu lalber a ni a, Hnam tin chungah ro a rêl ṭhîn.

²⁹Inei thaute chu a hmaah an kûn ang a, Inchâwm nung zo lo, vaivuta chang tûrte pawh A hmaah chuan an ṭhingṭhi ang.

³⁰Ṭhangtharten a rawng an bâwl ang a, An thlahte hnênah pawh LALPA thu hi an hril zêl ang.

³¹“LALPAN a mite a chhanhim,” tiin, La piang lote pawh an la hrilh ang.