Read Mizo Lushai Sam 27 Bible Online

Sam 27 - Mizo Lushai bible

Sam 27

¹ LALPA chu ka êng leh ka chhandamna a ni a, Tu nge ka hlauh vang? LALPA chu ka nun humhimtu kulh a ni a, Hlauh rêng ka nei lo ve.

²Ka hmêlma leh mi dotu mi sualten Tihboral tuma min beih lai khân, An inchhuih a, an tluchhe ta.

³Mi sual rualin min hual mah se, Ka hlau lo vang. Min do rawn mah sela, Ka zâm chuang hek lo vang.

⁴ LALPA hnênah thil pakhat ka dîl a, Chu mawlh chu ka zawng ang; LALPA mawizia hmu tûra zînga amah pâwlin, Ka dam chhûng zawng LALPA ina ka chên theihna tûr chu.

⁵Mangan ni chuan a bûktê-ah min thukru ang a, A puan in chhûngrilah min bihrûktîr ang a, Lungpui chungah min hlâng daih ang.

⁶Min hualtu hmêlmate chungah ka lêng ang a, A inah chuan tawtawrâwt ri nên inthawina ka hlân ang a, LALPA fakin ka zai bawk ang.

⁷ LALPA, ka auh che hi, lo ngaithla teh, Mi khawngaih la, mi chhâng ang che.

⁸Aw LALPA, nangin, “Mi zawng rawh u,” i ti a, Kei chuan ka zawng ang che.

⁹Ka lakah hian inthup suh la, I thinrimin i chhiahhlawh hi hawisan suh ang che; Min puitu ber i ni, min thlahthlam suh la, Min chhandamtu Pathian, min kalsan suh ang che.

¹⁰Ka nu leh pate chuan min kalsan tawh a, Mahse, LALPAN min enkawl ang.

¹¹ LALPA, i duhzâwng chu min zirtîr la, Min chângtute avângin I kawng tluangah min hruai ang che.

¹²Ka hmêlmate duh duha tihah min hlân suh la, Mi nunrâwng leh dâwta hêk chîngte chuan min bei a ni.

¹³Mi nung ramah hian LALPA ṭhatna hmuh beisei lo ila chuan, Ka chau daih tawh ang.

¹⁴ LALPA chu nghâk reng la, insangmarin intichak la. LALPA chu nghâk fan fan rawh.