Read Mizo Lushai Sam 31 Bible Online

Sam 31 - Mizo Lushai bible

Sam 31

¹ LALPA, ka rawn bêl che a, Eng lai mahin ka mualpho hi phal suh ang che. I rinawm a, min hum ang che.

²I beng chhi la, min chhan thuai rawh. Ka tân phen tûr lungpui ni la, Ka himna kulh lo ni ang che.

³Nang chu ka lungpui leh ka kulhbîng sâng i ni, I hming avângin min kaihruai ṭhîn ang che.

⁴An lên zâr rûk ata min hnûk chhuak ang che. Nang zawng ka tân himna i ni si.

⁵I kutah ka thlarau ka kawltîr e, Aw LALPA, Pathian rinawm, min tlan ang che.

⁶Eng mah ni lo milem betute chu ka huatzâwng tak an ni a, Kei zawngin LALPA ka ring a ni.

⁷I ngilneihna avângin hlimin ka lâwm ang a, Ka tuarnate i rawn hmu a, Ka manganzia pawh i hre vek si a.

⁸Ka hmêlmaten min man i phal lo va, Zalên takin min awmtîr ta a ni.

⁹Ka mang a ang êm e, LALPA, min khawngaih rawh, Lungngaihna avângin ka mit a vai zo va, Ka taksa leh ka thinlung pawh a chau zo ta.

¹⁰Lungngai rêng rêngin ka awm a, Ka hunte chu rûm nân ka hmang zo va, Ka bawhchhiatna avângin tha pawh ka nei ta lo, Ruh hlîr ruh hlîr ka ni ta e.

¹¹Ka hmêlmaten min hmusit a, Ka ṭhenawmten min deu hle a, Ka hmêlhriatte lahin min hlau va, Khawlaia min hmututen min tlânsan bawk.

¹²Thi tawh angin min theihnghilh zo ta a, Hlumbêl keh paih ang mai ka ni.

¹³Mi tam tak phun ru ka hria a, Hlauhawmin min hual vêl a, An inrâwn a, ka nunna lâk an tum a ni.

¹⁴Kei zawngin, LALPA, ka ring che a, “Pathian chu i ni,” ka ti a ni.

¹⁵Ka hunte chu i kutah a awm a, Mi tiduhdahtute leh min ûmtute lakah min chhanhim rawh.

¹⁶I chhiahhlawh chungah hian khawngaihna lantîr la, Khawngaihna tâwp lovin mi chhanhim ang che.

¹⁷ LALPA, ka au va che, min timualpho lul suh, Mi sualte chu mualphovin awm sela, Seol-ah chuan chhuk nghiai nghiai mai rawh se.

¹⁸Dâwt sawi chîngte hmui chu chîp hmiah rawh se, Chapo leh hmusit taka Mi dikte ṭawng khum thâr thârte chu.

¹⁹Nangmah ṭihtute tân thil ṭha i va khâwl khâwm tam êm! Mi dang hmuha nangmah bêltute tân i tihsak chu:

²⁰Miten an phiar laiin i ângchhûngah i dah a, An sawichhiat dâwn pawhin i bûk chhûngah i thukru ṭhîn.

²¹ LALPA chu fak rawh u, Râlin min hual laia A khawngaihna mak tak avângin.

²²Kei chuan “I hmuh lohvah min hnawt chhuak ta,” Ka lo ti hmanhmawh a; Mahse, khawngaih dîla ka auh che chuan I lo ngaithla var ṭhîn.

²³ LALPA ngaihsaktute u, amah hmangaih rawh u, LALPAN mi rinawmte a vêng tlat ṭhîn a ni. Chapo taka khawsate erawh chu hneh takin a thungrûl ṭhîn.

²⁴ LALPA nghâktu zawng zawngte u, insangmar ula, intihuai rawh u.